Նախորդ շաբաթվա կարևոր նորությունների հնգյակը (դեկտեմբերի 2–ից 6–ը)

ԵՐԵՎԱՆ, 7 դեկտեմբերի./Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը (դեկտեմբերի 2–ից 6–ը)։

• Քաղաքական գործիչ Շանթ Հարությունյանի որդին` Շահեն Հարությունյանը, ով վերջերս է ազատվել «Իմ քայլը» խմբակցության պատգամավոր Երջանիկ Հակոբյանի օգնականի պաշտոնից, վանդալիզմի ակտ է կատարել հռչակավոր ռուս դիվանագետ, բանաստեղծ և դրամատուրգ Ալեքսանդր Գրիբոյեդովի արձանի նկատմամբ, որը տեղադրված է Երևանում։ Հաջորդ օրը Հարությունյանը հրավիրվել է  ոստիկանություն` բացատրություն տալու։ Միաժամանակ ՀՀ–ում ՌԴ դեսպանատունը մեկնաբանել է միջադեպը։

• Հատուկ քննչական ծառայությունում քննվող քրեական գործի նախաքննության ընթացքում ձեռք բերված բավարար ապացույցների համակցության հիման վրա ՀՀ նախկին նախագահ Սերժ Սարգսյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով (հանցակցություն յուրացման և վատնման մեջ) նախատեսված հանրորեն վտանգավոր այն արարքի կատարման համար, որ նա, 2008 թվականի ապրիլի 9-ից մինչև 2018 թվականի ապրիլի 9-ը զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով, 2013 թվականի հունվարի 25-ից մինչև նույն թվականի փետրվարի 7-ն ընկած ժամանակահատվածում կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489.160.310 ՀՀ դրամի հափշտակության կատարումը։ ՀՀ վարչապետ Նիկոլ Փաշինյանը մեկնաբանել է Սարգսյանին առաջադրված մեղադրանքները։ ՀՀԿ–ն իր հերթին արձագանքել է առաջադրված մեղադրանքներին։ 

• Բրատիսլավայում ԵԱՀԿ 26-րդ նախարարական խորհրդաժողովի շրջանակում տեղի է ունեցել Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հանդիպումը։

• ՀՀ քաղավիացիայի կոմիտեի նախագահ Տաթևիկ Ռևազյանը հայտարարել է, որ շուտով տեղական շուկա կարող է մուտք գործել հայկական նոր ավիաընկերություն:–0–