ԵՐԵՎԱՆ, 5 մայիսի./Նովոստի–Արմենիա/. Ոստիկանությունը բերման է ենթարկել ASALA–ի մարտիկ Համբիկ Սասունյանին։ Այս մասին հայտնել է իրավապաշտպան Ռուբեն Մելիքյանը Facebook–յան իր էջում։
«Համբիկը Հանուն Հայրենիքի 40 տարի է նստել։ Ոչինչ, երեք ժամ էլ կդիմանա…», – գրել է Մելիքյանը։
Երևանում մայիսի 2–ից անցկացվում են ընդդիմության անհնազանդության ակցիաները` ՀՀ վարչապետ Նիկոլ Փաշինյանի հրաժարականի պահանջով։ Մասնակիցները պարբերաբար փակում են քաղաքի առանցքային խաչմերուկները, կամուրջներն ու փողոցները։
Սասունյանի մասին
Համբիկ Սասունյանը ծնվել է Լիբանանի մայրաքաղաք Բեյրութում 1963 թ.–ին։ Եղել է «Հայկական ցեղասպանության արդարության մարտիկներ» խմբի անդամ, արտագաղթել է ԱՄՆ։ 1984թ.–ին դատարանը վճիռ է կայացրել, որ 19–ամյա Համբիկը 1982թ.–ի հունվարի 28–ին առավոտյան Լոս Անջելեսում սպանել է թուրք դիվանագետ Քեմալ Արիքանին, երբ նա կանգնած է եղել լուսացույցի մոտ։
Կալանքից հետո ԱՄՆ դատարանը Սասունյանին դատապարտել է ցմահ ազատազրկման` առանց բողոքարկման իրավունքի։ Սասունյանն իր արարքը հիմնավորել է թուրքերի և թուրքական ռեժիմի նկատմամբ վրեժով 1915–ի Ցեղասպանության համար։ ԱՄՆ դատարանը 2006 և 2010թթ.–ին մերժել է Սասունյանի համաներման խնդրագիրը։
2019թ.–ի դեկտեմբերի 27–ին Կալիֆոռնիայի համաներման հանձնաժողովը բավարարել է Սասունյանի վաղաժամ ազատման միջնորդությունը, բայց նահանգապետ Գևին Նյուսոմը մերժել է այդ որոշումը։ 2021թ.–ի փետրվարի 24–ին Լոս Անջելեսի Գերագույն դատարանը չեղարկել է նահանգապետի որոշումը։ Նահանգապետը նշել է, որ այլևս չի բողոքարկի դատարանի վճռի դեմ։ 2021թ.–ի մարտին հրապարակվել է Սասունյանի վաղաժամ ազատման որոշումը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում