Հայտնի է, որտեղից է գաղտնալսվել Սասուն Խաչատրյանի և Արթուր Վանեցյանի հեռախոսազրույցը

ԵՐԵՎԱՆ, 30 հոկտեմբերի. /Նովոստի-Արմենիա/. Հատուկ քննչական ծառայության ղեկավար Սասուն Խաչատրյանի և Ազգային անվտանգության ծառայության նախկին տնօրեն Արթուր Վանեցյանի հեռախոսազրույցի գաղտնալսման ֆայլը հրապարակվել է ԱՊՀ անդամ պետություններից մեկից, չորեքշաբթի լրագրողների հետ զրույցում հայտարարեց Հայաստանի քննչական կոմիտեի նախագահ Հայկ Գրիգորյանը:

2018 թ. սեպտեմբերի 11–ին ցանցում հայտնվել է ԱԱԾ տնօրեն Արթուր Վանեցյանի և ՀՔԾ ղեկավար Սասուն Խաչատրյանի հեռախոսազրույցի ձայնագրությունը, որում նրանք քննարկում են Հայաստանում պետպաշտոնյաների նկատմամբ հարուցված աղմկոտ քրեական գործերի հետ կապված իրավիճակը։ Մասնավորապես, խոսքը գնում էր Ռոբերտ Քոչարյանի հարցաքննության թեմայի և Խաչատուրովին մեղադրանք առաջադրելու ու կալանավորելու մասին։

«Մեզ հայտնի է, թե որտեղից են հրապարակվել այս ֆայլերը: Դա Հայաստանից չի արվել: Չխախտելով նախաքննական գաղտնիքը, ասեմ միայն, որ դա արվել է ԱՊՀ անդամ երկրներից մեկից», - հայտարարեց նա:

Ավելի վաղ հայտնի է դարձել, որ ԱԱԾ-ն տեղական մասնագետների հետ միասին սկսել է ծրագրի մշակում, որը պետք է պաշտպանի գաղտնալսման ցանկացած տեսակից: Ներկա պահին ծրագիրը գտնվում է մշակման փուլում` ԱԱԾ աշխատանքային անվանումով:-0-