358 ծանր, 58 ծայրահեղ ծանր պացիենտ. Փաշինյանը տվյալներ է ներկայացրել

ԵՐԵՎԱՆ, 30 մայիսի./Նովոստի–Արմենիա/. Այսօր պարետատան նիստում մենք արձանագրեցինք, որ շատ ծանր է անցնում կորոնավիրուսը շաքարային դիաբետ և բարձր զարկերակային ճնշում ունեցող քաղաքացիների մոտ, ասաց ՀՀ վարչապետ Նիկոլ Փաշինյանն այսօր կայացած ճեպազրույցի ընթացքում։


«Մենք գիտենք, որ սրանք չափազանց տարածված հիվանդություններ են Հայաստանում։ Ուզում եմ արձանագրել, որ այս ընթացքում բազմաթիվ դեպքեր են եղել, երբ նման հիվանդությունների առկայությունը հայտնաբերվել է միայն պացիենտի հոսպիտալացումից հետո, և մարդիկ նույնիսկ տեղյակ չեն եղել այդպիսի հիվանդությունների առկայության մասին իրենց օրգանիզմում», – նշեց Փաշինյանը։

Նրա խոսքով, այսօր հանրապետության վերակենդանացման բաժանմունքներն աշխատում են խիստ ծանրաբեռնված ռեժիմով, որովհետև ծանր և ծայրահեղ ծանր հիվանդների թիվը բավականին շատ է, և վերջին օրերի դինամիկայի հետ մեծացել է։

«Երեկվա դրությամբ ծանր վիճակում գտնվում է 358 պացիենտ, ծայրահեղ ծանր վիճակում 58 պացիենտ, թոքային օդափոխման սարքին միացված է 15 պացիենտ», – նշել է վարչապետը։

Հայաստանում մայիսի 30-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 8927 դեպք, որոնցից 3317-ն` առողջացած, 127-ը` մահվման ելքով:–0–