ԵՐԵՎԱՆ, 31 մայիսի․/Նովոստի–Արմենիա/․ ՀՀ ԱԳՆ–ի շենքի մոտ սկսվել են բախումներ ցուցարարների և ուժայինների միջև։ Կան բերման ենթարկվածներ։
Դրանից առաջ Հայ Առաքելական Եկեղեցու Տավուշի թեմի առաջնորդ, «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը ՀՀ ՆԳ նախարար Վահե Ղազարյանին կոչ արեց ապահովել իրենց անարգել մուտքը Արտգործնախարարության շենք։
«Կես ժամ ժամանակ եմ տալիս այս մարդկանց, կամ իջնում են ներքև, կամ մենք լրագրողներով բարձրանում ենք վերև: Հստակ ասում եմ, եթե չեք ուզում որևէ շարժ լինի խելոք կիջնեք ներքև: Եթե ուզում եք, ստացվում է, որ դուք հրահրում եք, պատասխանատվությունը ձեզ վրա է», – ասել է Գալստանյանը։
Նա նշել է, որ Արարատ Միրզոյանը կամ ինչ-որ մեկը պետք է պատասխան տա։
«Հակառակ դեպքում Արարատ Միրզոյանն այստեղից չի հեռանա։ Մենք տեղեկություն ենք ստանում, ստուգում ենք, որ շենքի հետևում հավաքված են ԱԱԾ հատուկ նշանակության ջոկատներ»,- ասել է Գալստանյանը։
Ավելի վաղ ոստիկանությունից հայտարարել էր, որ այս պահին ԱԳՆ–ում չեն կարող ընդունել «Տավուշը հանուն հայրենիքի» շարժման ներկայացուցիչներին։ Ոստիկանությունը կոչ էր արել չգնալ բախումների, հակառակ դեպքում կկիրառվեն հատուկ միջոցներ։
Ծանոթացեք լուրերին առաջինն ու քննարկեք դրանք մեր Telegram-յան ալիքում
