Երկու տարի սոցիալական հեռավորություն և կորոնավիրուսի նոր բռնկման հավանականություն. Թորոսյանը զգուշացնում է

ԵՐԵՎԱՆ, 14 ապրիլի./Նովոստի–Արմենիա/. ՀՀ առողջապահության նախարար Արսեն Թորոսյանը, պատասխանելով «Ազատություն» ռ/կ–ի հարցին, հայտարարեց, որ Հայաստանը, հավանաբար, ստիպված կլինի դեռևս երկու տարի ապրել սոցիալական հեռավորության պահպանման ռեժիմում, կրել դիմակներ և ձեռնոցներ։

Թորոսյանը հայտարարեց, որ կա մեծ հավանականություն, որ աշնանը, երբ ընկնեն ցրտերը, տարբեր երկրներում կսկսվեն հիվանդության բռնկումներ, քանի որ կորոնավիրուսի շրջանառություն անգամ լավ սցենարների դեպքում իսպառ չի վերանա, ինչպես շատ այլ վիրուսների դեպքում։

«Եվ ամենաքիչը հաջորդ աշնանը, ձմռանն ու գարնան սկզբին, եթե կտրուկ գիտական փոփոխություններ չլինեն դեղի կամ պատվաստանյութի մասով, կրկին մարտահրավերի առաջ ենք լինելու։ Եվ դրանով են պայմանավորված իմ սպասումները, որ մենք դեռ երկար պետք է պահպանենք որոշ սանիտարահիգիենիկ նորմեր, սոցիալական հեռավորություն, կրենք դիմակներ, ձեռնոցներ, օգտագործենք ախտահանող միջոցներ», – նշեց նախարարը։

Ապրիլի 14–ի դրությամբ Հայաստանում գրանցվել է կորոնավիրուսով վարակման 1067 դեպք, առողջացել է 265 մարդ, 16 մարդ, ցավոք, մահացել է։–0–