Գրեթե կես միլիոն քաղաքացու կենսաթոշակ կբարձրանա, նպաստները ևս կավելանան

ԵՐԵՎԱՆ, 1 նոյեմբերի./Նովոստի–Արմենիա/. ՀՀ աշխատանքի և սոցիալական հարցերի նախարար Զարուհի Բաթոյանը ներկայացրել է 2020թ.–ին քաղաքացիների կենսաթոշակների և նպաստների բարձրացման հետ կապված մանրամասները։

Ինչպես նշեց նախարարն ուրբաթ ԱԺ–ում, կենսաթոշակները կբարձրանան միջինը 10%–ով, նախատեսվում է, որ կբարձրանա շուրջ 33 646 զինվորական կեսաթոշակառուների և 468 761 աշխատանքային կենսաթոշակառուների կենսաթոշակների չափերը:

«Մենք նախատեսում ենք նվազագույն կենսաթոշակի չափը 25 500 դրամից դարձնել 26 500 դրամ, աշխատանքային և զինվորական կենսաթոշակի չափը հաշվարկելու համար հիմնական կենսաթոշակի չափը դարձնել 18 000 դրամ` 16000 դրամի փոխարեն, և աշխատանքային ստաժի մեկ տարվա արժեքն առաջին 10 տարվա համար սահմանել 950 դրամ` 800 դրամի փոխարեն», – նշեց Զարուհի Բաթոյանը։

«Նախատեսվում է ավելացնել առաջին և երկրորդ երեխայի ծննդյան միանվագ վճարը` համապատասխանաբար 6 և 2 անգամ` 50 հազար և 150 հազար դրամից դարձնելով համապատասխանաբար 300 հազար դրամ։ Այս ծրագրի վրա լրացուցիչ կհատկացվի ավելի քան 2,5 մլրդ դրամ», – ասաց Բաթոյանը։–0–