Հայաստանում նվազագույն աշխատավարձը կբարձրանա

ԵՐԵՎԱՆ, 3 հոկտեմբերի./Նովոստի–Արմենիա/. ՀՀ ԱԺ–ն հինգշաբթի առաջին ընթերցմամբ հավանություն տվեց «Նվազագույն ամսական աշխատավարձի մասին» և «Պետական պաշտոն զբաղեցնող անձանց վարձատրության մասին» օրենքներում նախատեսված փոփոխությունների ընդունմանն, ըստ որոնց` նվազագույն աշխատավարձը 55 հազար դրամից դառնում է 68 հազար դրամ։

Օրինագծի ընդունմանը կողմ քվեարկեց 102 պատգամավոր, մեկ պատգամավոր ձեռնպահ մնաց։

Օրինագծի համահեղինակ, «Իմ քայլը» խմբակցության պատգամավոր Վարազդատ Կարապետյանը նշեց, որ սկզբում նախագծով առաջարկվում էր նվազագույն աշխատավարձը բարձրացնել մինչև 63 հազար դրամ, սակայն կառավարության հետ քննարկումներից հետո այդ գումարը բարձրացվեց։

«Մենք սկզբում առաջարկել էինք 63 հազար դրամ, որպեսզի ազդեցություն չգործենք բազային աշխատավարձի վրա, որը հիմա կազմում է 66 հազար դրամից մի փոքր ավել և որով հաշվարկվում են պետական համակարգի բոլոր աշխատավարձերը, այդ թվում` պատգամավորներինը», – նշեց նա։

Պատգամավորի խոսքով, կառավարությունն առաջարկել է բարձրացնել ևս 5 հազար դրամով, որպեսզի դա ազդի նաև բազային աշխատավարձի վրա։                                                                                                                                             

Կարապետյանը նաև ասաց, որ ըստ հաշվարկների, աշխատավարձերի բարձրացման արդյունքում բյուջեից կպահանջվի հատկացնել առնվազն 2 մլրդ դրամ, ինչին կառավարությունը տվել է իր համաձայնությունը։

ՀՀ–ում նվազագույն աշխատավարձն այսօր կազմում է 55 հազար դրամ։ Վերջին անգամ այն բարձրացվել է 2015թ.–ին։

ՀՀ ֆինանսների նախարարության տվյալներով, Հայաստանում միջին աշխատավարձը 2018թ.–ի արդյունքներով կազմել է 172 հազա դրամ, ընդ որում պետական համակարգում այն ավելի ցածր է, քան մասնավոր հատվածում և կազմել է միջինը 149 հազար դրամ` մասնավոր հատվածում գրանցված 186 հազար դրամի համեմատ։–0–