Ինչպե՞ս են ՌԴ–ում առգրավում հայկական համարանիշերով մեքենաները. Մարուքյանը տեսանյութ է հրապարակել ու խոսել փոխվարչապետի հետ (ՎԻԴԵՈ)

ԵՐԵՎԱՆ, 7 օգոստոսի./Նովոստի–Արմենիա/. «Լուսավոր Հայաստան» ընդդիմադիր կուսակցության և խմբակցության առաջնորդ Էդմոն Մարուքյանը կրկին անդրադարձել է Ռուսաստանում հայկական պետհամարանիշերով մեքենաների հետ կապված խնդրին։

«Ռուսաստանի Դաշնությունում ոստիկանությունը հայկական պետհամարանիշերով մեքենաների տերերից շարունակում է պահանջել մաքսային փաստաթուղթ, որը իմ կարծիքով հակասում է ԵԱՏՄ ընթացակարգերին: Տեղեկացնում եմ, որ երեկ այս հարցով խոսել եմ ՀՀ փոխվարչապետ` Մհեր Գրիգորյանի հետ, ով զբաղվում է նշված խնդրով: Հուսով եմ` խնդիրն արագ կկարգավորվի», – նշել է նա Facebook-յան իր էջում:

Մարուքյանը որպես հետգրություն ավելացրել է. «ՀՀ փոխվարչապետ Մհեր Գրիգորյանի գրավոր պատասխանը խնդրի կարգավորման վերաբերյալ ստանալուն պես կհրապարակեմ»:

Ինչպես հաղորդել էինք ավելի վաղ, Ռուսաստանում սկսել են առգրավել հայկական համարանիշերով մեքենաները։ Հայաստանում հաշվառման մեջ գտնվող, բայց ռուսաստանցիների սեփականությունը համարվող մեքենաների արգելքը տարածվել է 2017–2020թթ.–ին ձեռք բերված 200 հազար մեքենաների վրա։ Ըստ հրապարակման, մինչև վերջերս որևէ խնդիր չէր առաջանում` կապված ՌԴ–ում հսյկական համարանիշերով մեքենաների հետ, սակայն վերջերս և′ մաքսային մարմինները, և′ ՌԴ ՃՈ–ն հանկարծ սկսել են պահանջներ ներկայացնել։–0–