ԵՐԵՎԱՆ, 25 մարտի./Նովոստի–Արմենիա/. Երևանցիները, ինչպես նաև Հայաստանի մյուս մարզերի բնակիչներն արդեն շուրջ 10 օր է` ապրում են արտակարգ դրության պայմաններում, որը սահմանվել է մարտի 16–ին կորոնավիրուսի տարածումը կանխելու նպատակով։
Սակայն միայն արտակարգ դրության սահմանումը բավարար չեղավ։ Նախօրեին ՀՀ վարչապետ Նիկոլ Փաշինյանը տեղեկացրեց, որ կեսգիշերից, յոթ օրով, ներդրվում են քաղաքացիների տեղաշարժի և տնտեսական գործունեություն ծավալելու նոր սահմանափակումներ։
Հիմա տնից թույլատրվում է դուրս գալ ծայրահեղ անհրաժեշտության դեպքում` ունենալով անձը հաստատող փաստաթուղթ և պարետի կողմից սահմանված ձևաթուղթ, որը կարելի է լրացնել ձեռագիր։
Հայտարարվեց, որ երկրում աշխատելու են սահմանափակ թվով օբյեկտներ, որոնց թվում են մթերային խանութներն ու դեղատները։
«Նովոստի–Արմենիա» գործակալության թղթակիցը որոշեց ստուգել` արդյոք հետևում են երևանցիները նախօրեին սահմանված խիստ կանոններին ու սահմանափակումներին։
Երևանի կենտրոնական փողոցներում անսովոր դատարկություն է տիրում։ Կան քիչ թվով մեքենաներ, և դա այն դեպքում, երբ սովորական օրերին Երևանի կենտրոնում կիլոմետրանոց խցանումներ են։
Քիչ է նաև հասարակական տրանսպորտը, փողոցներում հազվադեպ կարելի է տեսնել ավտոբուսներ և տրոլեյբուսներ, բայց շատ են հեծանիվներով մարդիկ։
Պուրակներն ու այգիները ևս մարդաշատ չեն։
Երևանցիների և Հայաստանի հյուրերի սիրելի վայրը` Սարյան փողոցի գինետների շարքը, սրճարաններն ու ռեստորանները ևս փակ են։
Դրա փոխարեն «բարգավաճում է» փողոցային առևտուրը։ Չնայած Երևանի քաղաքապետարանի հորդորներին, առևտրականները նախկինի պես իրենց ապրանքը դասավորում են հենց մայթերին, սակայն պետք է նշել, որ նրանց առևտուրը շատ «թույլ է»։
Բաց էր նաև քաղաքի կենտրոնական հատվածում գտնվող մատուռը։ Իհարկե ներսու ոչ ոք չկար։
Եվ այս ամենը` երևանյան մեղմ գարնան ֆոնին, որի համար ոչ մի նշանակություն չունեն վիրուսներն ու արտակարգ դրությունը։ Եվ, նայելով վառ կապույտ երկնքի ֆոնին ծաղկող ծառերին կամա, թե ակամա ուզում ես հավատալ, որ մենք շուտով կհաղթենք, և մեր սիրելի քաղաքը կվերադառնա իր առօրյային, իսկ երևանցիներն, անցնելով դաժան փորձության միջով, կսկսեն ավելի հոգատար վերաբերվել շրջապատող աշխարհին և միմյանց։–0–
