ԵՐԵՎԱՆ, 28 հուլիսի./Նովոստի–Արմենիա/. ՀՀ սննդամթերքի անվտանգության տեսչական մարմնի ղեկավարի հրամանով՝ կասեցվել է անհատ ձեռանարկատեր Սերգեյ Սարգսյանին պատկանող կաթնամթերքի (պանրի) արտադրամասի արտադրական գործունեությունը (Լոռու մարզ, ք. Վանաձոր), հաղորդում է ՀՀ սննդամթերքի անվտանգության տեսչական մարմինը:
Որոշման հիմքը Տեսչական մարմնի Լոռու մարզային կենտրոնի տեսուչների վերահասկողական միջոցառումների ընթացքում արձանագրված սանիտարահիգիենիկ նորմերի խախտումներն են:
«Մասնավորապես՝ պանրի հասունացման պահեստը չի պահվել մաքուր և նորոգ վիճակում, չի ունեցել խոնավ մաքրման և ախտահանման հնարավորություն, հատակը հարթ չէ, առկա են եղել ճեղքեր, ծածկված չի եղել խոնավ մաքրումն ու ախտահանումը ապահովող անջրաթափանց նյութերով, պահեստային հատվածում գտնվող պանրի աղաջրային վաննաներից երկուսը քարից են՝ հարթ ու ախտահանվող չեն: Նաև՝ կենցաղային սենքում չի եղել հանդերձարան անձնակազմի համար, իսկ սննդի շղթայում ներգրավված անձնակազմը չի ենթարկվել պարտադիր նախնական և պարբերական բժշկական զննությունների», – նշվում է գերատեսչության հաղորդագրության մեջ:
Նշված խախտումների վերացման համար Տեսչական մարմինը սահմանել է ժամկետ:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում