ԵՐԵՎԱՆ, 21 հուլիսի./Նովոստի–Արմենիա/.ԿԸՀ քարտուղար Արմեն Սմբատյանը հրապարակել է այն անձանց ցանկը, ովքեր հրաժարվել են պատգամավորական մանդատներից։
Ցանկում նշված է 18 մարդ, այդ թվում` ՀՀ վարչապետի պաշտոնակատար, «Քաղաքացիական պայմանագիր» կուսակցության նախագահ Նիկոլ Փաշինյանը և նախկին նախագահ, «Հաայաստան» դաշինքի առաջնորդ Ռոբերտ Քոչարյանը։
Ինչպես Facebook–յան իր էջում գրել է Սմբատյանը, հուլիսի 20-ին, ժամը 18:00-ի դրությամբ ԱԺ 2021 թվականի հունիսի 20-ին կայացած ընտրություններում ընտրական ցուցակներում ընդգրկված և ինքնաբացարկ հայտնած թեկնածուների ցանկը հետևյալն է.
ՔԱՂԱՔԱՑԻԱԿԱՆ ՊԱՅՄԱՆԱԳԻՐ ԿՈՒՍԱԿՑՈՒԹՅՈՒՆ՝
1․ Լիլիթ Մակունց
2․Սուրեն Պապիկյան
3․Արայիկ Հարությունյան
4․Նիկոլ Փաշինյան
5․Անահիտ Ավանեսյան
6․Ռոմանոս Պետրոսյան
7․Հովհաննես Հարությունյան
8․Հակոբ Սիմիդյան
9․Գնել Սանոսյան
10․Համբարձում Մաթևոսյան
11․Դիանա Գասպարյան
12․Դավիթ Գևորգյան
13․Նարեկ Մկրտչյան
14․Արամ Խաչատրյան
15․Արարատ Միրզոյան
16․Արմեն Փամբուխչյան
ՀԱՅԱՍՏԱՆ ԴԱՇԻՆՔ՝
1․Ռոբերտ Քոչարյան
2․Մարիաննա Եփրեմյան
Ռոբերտ Քոչարյանը հուլիսի 19–ին հայտնել էր պատգամավորական մանդատից հրաժարվելու մասին` հիմնավորելով իր որոշումը նրանով, որ «բնավորության կերտվածքով միշտ հանդիսացել է գործադիր իշխանության մարդ»։
Նա նաև նշել է, որ Ազգային ժողով իր չգնալը չի նշանակում դուրս գալ պայքարից։
««Հայաստան» դաշինքը, կարևորելով դեռևս 2020 նոյեմբերին սկսված ժողովրդական շարժման և ընտրություններին իրեն ձայն տված առնվազն 270 հազար քաղաքացիների ակնկալիքներն ու պահանջը, որոշում է կայացրել վերցնել պատգամավորական մանդատները՝ ստանձնելով նաև խորհրդարանում պայքարը շարունակելու պատասխանատվությունը», – նշվում է Facebook–ում հրապարակված հայտարարության մեջ:
«Հայաստան» դաշինքից նշել են, որ ամբողջությամբ գիտակցում են պատասխանատվությունը իրենց ընտրողների, Հայաստանի, Արցախի և Սփյուռքի հայության առջև՝ այս «կործանարար ընթացքը կասեցնելու, ազգային նպատակներին ծառայող նոր որակի իշխանություն ձևավորելու, հայության ամբողջական ներուժը համախմբելու, մեր երկիրը ամրապնդելու և զարգացման ուղի դուրս բերելու հարցում»։
«Պատիվ ունեմ» ընդդիմադիր ուժի դիրքորոշումը (հիմնադիրներն են նախկին իշխող ՀՀԿ–ն` երրորդ նախագահ Սերժ Սարգսյանի և ԱԱԾ նախկին տնօրեն Արթուր Վանեցյանի գլխավորությամբ) խորհրդարանում աշխատանքի մասին այս պահին չի հրապարակվել։
Նախօրեին հրապարակված դաշինքի հայտարարության մեջ նշվում է, որ դաշինքը հնարավոր բոլոր միջոցներով շարունակելու է պայքարը այս իշխանությունների կամայականությունների, ապօրինությունների զսպման ուղղությամբ՝ որպես գլխավոր նպատակ ունենալով նրանց հեռացումն ու մեր ժողովրդին իրական ու արժանապատիվ խաղաղություն և անվտանգություն բերելու առաջնահերթությունը:–0–