ԵՐԵՎԱՆ, 4 փետրվարի./Նովոստի–Արմենիա/. 2020թ.–ի մարտից այն հիվանդները, որոնց մոտ ախտորոշվել են կրծքագեղձի քաղցկեղի I-III փուլերը, կարող են տրաստուզումաբով բուժում անցնել պետական ծրագրի շրջանակում, երեքշաբթի ասուլիսի ժամանակ տեղեկացրեց առողջապահության նախարարի խորհրդական Հայկուհի Գյոկչյանը։
«Պետությունն իր վրա է վերցրել այս դեղորայքի ձեռքբերման ծախսերը, և արդեն մարտից այն կօգտագործվի այն կանանց բուժման համար, որոնց մոտ ախտորոշվել են կրծքագեղձի քաղցկեղի I-III փուլերը», – նշեց նա։
Գյոկչյանը նաև նշեց վաղ սկրինինգ անցնելու կարևորությունը։ Նա հիշեցրեց, որ 2015թ.–ից Հայաստանում գործում են անվճար սկրինինգի մի շարք ծրագրեր, մասնավորապես` պապ–թեստը` օրգանիզմում նախաքաղցկեղային փոփոխությունների հայտնաբերման համար։
«Պապ–թեստի միջոցով ախտորոշումն անվճար կարող են անցնել 30–59 տարեկան բոլոր կանայք ցանկացած պոլիկլինիկայում կամ ամբուլատոր կենտրոնում։ Ծրագրի նպատակն է հայտնաբերել արգանդի վզիկի նախաքաղցկեղային փոփոխություններն ու կանխարգելել վաղ փուլում», – ասաց նա։
Խոսելով կանանց առողջության պահպանման ծրագրերի մասին` Գյոկչյանը նշեց, որ 2020թ.–ին Սյունիքի, Տավուշի և Լոռվա մարզերում կգործարկվի նաև կանանց մոտ կոլոռեկտալ քաղցկեղի սկրինինգի փորձնական ծրագիր։
«Ծրագիրը կիրականացվի Ֆանարջյանի անվան ուռուցքաբանության ազգային կենտրոնի աջակցությամբ, որի շարժական լաբորատորիաները կանցկացնեն հետազոտություններ այդ երեք մարզերի բոլոր խոշոր բնակավայրերում։ Փորձնական փուլի արդյունքում ծրագիրը կարող է տարածվել Հայաստանի և Արցախի ողջ տարածքում», – ասաց նա։
Փորձագետն ընդգծեց, որ արդեն 2020թ.–ի հունվարի 1–ից չարորակ ուռուցքի վիրաբուժական հեռացումը Հայաստանում իրականացվում է պետական աջակցության շրջանակում, իսկ պոլիկլինիկաներում տրամադրվում են բուժծառայություններ քիմիաթերապիայի շրջանակում։
Առողջապահության նախարարության վիճակագրության համաձայն, 2018թ.–ին Հայաստանում գրանցվել է չարորակ գոյացությունների 8441 դեպք։ Տղամարդկանց շրջանում առավել տարածված է շնչուղիների, բրոնխների, թոքերի, ստամոքսի, լեղու ծորանների և շագանակագեղձի քաղցկեղը, կանանց մոտ` կրծքագեղձի, շնչուղիների, բրոնխների, հաստ աղու քաղցկեղը։–0–
