ՌԴ–ում ազգականների մոտ մնացած 3 անչափահաս հայ երեխաները վերադարձել են Հայաստան. նրանց օգնել է Մարդու իրավունքների պաշտպանի գրասենյակը

ԵՐԵՎԱՆ, 20 ապրիլի./Նովոստի–Արմենիա/. Քաղաքացին դիմել է Մարդու իրավունքների պաշտպանի աջակցությանը եղբոր երեք անչափահաս երեխաների (16, 14 և 10 տարեկան) տեղափոխումը Հայաստան կազմակերպելուն աջակցելու հարցով, հաղորդում է Մարդու իրավունքների պաշտպանի  գրասենյակը։ 

«Մարդու իրավունքների պաշտպանի ներկայացուցիչը հարցը քննարկել է ՌԴ-ում ՀՀ գլխավոր հյուպատոսության, ՌԴ-ում ՀՀ դեսպանության, ինչպես նաև Սանկտ Պետերբուրգի հյուպատոսության ներկայացուցիչների հետ Վիբորգից Մոսկվա քաղաք և Մոսկվայից ապրիլի 12-ին նախատեսվող չվերթով անչափահաս երեխաներին Հայաստան ճանապարհելու հարցով», – նշում են Մարդու իրավունքների պաշտպանի գրասենյակից։

Ավելի ուշ Սանկտ Պետերբուրգի հյուպատոսությունից կապվել են Պաշտպանի աշխատակազմի հետ և տեղեկացրել, որ հյուպատոսության ավտոմեքենայով իրենք երեխաներին կտեղափոխեն Մոսկվա, որտեղ երեխաներին կդիմավորեն ՌԴ-ում ՀՀ դեսպանության ներկայացուցիչները և կճանապարհեն Հայաստան։ 

Համագործակցության արդյունքում երեխաներն արդեն Հայաստանում են։–0–