ԵՐԵՎԱՆ, 4 ապրիլի./Նովոստի–Արմենիա/. Հայկական երկու ավիաընկերություններին, հնարավոր է, զրկել են Եվրոպա թռիչքներ կատարելու լիցենզիայից կորոնավիրուսի պատճառով, ասել է ՀՀ քաղաքացիական ավիացիայի կոմիտեի ղեկավար Տաթևիկ Ռևազյանը շաբաթ օրը Հայաստանի հանրային հեռուստաընկերությանը տված առցանց հարցազրույցի ժամանակ։
Այսօր ավելի վաղ կոմիտեն հերքել էր ԶԼՄ–ներում շրջանառվող տեղեկությունն այն մասին, որՀայաստանի Քաղաքացիական ավիացիայի կոմիտեն զրկվել է լիցենզիայից։
«Խոսքն այն մասին է, որ Հայաստանում գրանցված ավիաընկերություններից ժամանակավոր վերցրել են դեպի Եվրոպա չվերթեր իրականացնելու թույլտվությունը։ Մենք պարզաբանումներ ենք խնդրելու Եվրոպայի գործընկերից, թե ինչո՞ւ են այդքան արագ որոշում կայացրել, քանի որ դեռ իրենք պետք է արձագանքեին դիտարկումներին», – ասել է Ռևազյանը:
Նա նաև տեղեկացրել է, որ վերջնական որոշումը պետք է ընդունվեր մայիսի 12–14–ը Բրյուսելում կայանալիք նիստերի ընթացքում։
«Եվրոպայում շատ ընթացակարգեր փոխվում են կորոնավիրուսի պատճառով։ Հնարավոր է` դա էլ ազդել է», – ասել է նա։
Ռևազյանի խոսքով, կոմիտեն պետք է իրականացնի շատ փոփոխություններ, և դրա համար հարկավոր է թե′ ժամանակ, թե′ ռեսուրսներ։
«Եթե դիտենք թռիչքների թվի տեսանկյունից, ապա լուրջ ազդեցություն չի լինի, քանի որ մենք բավականին քիչ թռիչքներ ունենք դեպի Եվրոպա», – ասել է Ռևազյանը` տեղեկացնելով, որ լիցենզիայից զրկելու որոշումը կբողոքարկվի երկուշաբթի` ապրիլի 6–ին։
«Կոմիտեն նամակ կուղարկի Թռիչքների անվտանգության եվրոպական գործակալություն, որում կներկայացնի իրավիճակի իր տեսլականը», – նշել է Ռևազյանը։–0–
