ԵՐԵՎԱՆ, 22 սեպտեմբերի./Նովոստի–Արմենիա/. Ռուսաստան մեկնել ցանկացող ՀՀ քաղաքացիներն այսօր հացադուլ են սկսել կառավարության շենքի մոտ։
Մի քանի քաղաքացիներ պաստառներով նստել են կառավարության շենքի մոտ։ Պաստառների վրա գրված է. «Ուզում եմ Ռուսաստան», «Հացադուլ, սպասում ենք վարչապետի դրական պատասխանին»։
Վերջին ամսում մշտապես բողոքի ակցիաներ են կազմակերպվում կառավարության , ԱԳՆ–ի շենքի մոտ։ Ռուսաստանում աշխատող ՀՀ քաղաքացիները պահանջում են, որպեսզի իրենց թույլ տան մուտք գործել ՌԴ։
Հիշեցնենք, որ Ռուսաստանի կառավարությունը հանել է օդային մուտքի արգելքը ԵՏՄ երեք երկրների` Բելառուսի, Ղազախստանի, Ղրղըզստանի, ինչպես նաև Կորեայի Հանրապետության քաղաքացիների համար։
ԵՏՄ–ի կազմում ներառվող Հայաստանը ցանկում չկա։
Միաժամանակ, մոտ մեկ շաբաթ առաջ հայտնի դարձավ, որ «Աերոֆլոտը» վերսկսում է կանոնավոր ավիահաղորդակցությունը Հայաստանի հետ, և հոկտեմբերի 25–ից իրականացվելու են ամենօրյա չվերթեր Մոսկվա–Երևան–Մոսկվա երթուղով։ Եվս երեք ռուսական ավիաընկերություններ`NordStar-ը, «Ուրալյան ավիաուղիները» և AZUR air–ը Ռոսավիացիայից խնդրել են թույլտվություն Հայաստան չվերթեր իրականացնելու համար։
Ավիահաղորդակցություն Հայաստանի հետ. կոնկրետ քայլեր
«Զվարթնոց» միջազգային օդանավակայանն օրերս
հրապարակել է ավիաընկերությունների ցանկ, որոնք արդեն վերսկսել են կամ նախատեսում են վերսկսել կանոնավոր չվերթեր դեպի Հայաստան։ Դրանց թվում են Ռուսաստանը, Ֆրանսիան, Բելառուսը, Ուկրաինան, ԱՄԷ–ն, Լիբանանը, Քաթարը, Եգիպտոսը, Իրանը։
Ավիաընկերությունների մասին տեղեկատվություն կարելի է ստանալ`զանգելով 187 կամ
հետևյալ հղումով։
Հայաստանի Հանրապետության տարածք մուտք գործող անձը, եթե ախտանշաններ առկա չեն և նա չի հոսպիտալացվել, կարող է իր ընտրությամբ կամ ինքնամեկուսանալ 14-օրյա ժամկետով, կամ էլ ինքնամեկուսացման ընթացքում անցնել ՊՇՌ հետազոտություն և թեստի բացասական պատասխան ստանալու դեպքում դուրս գալ ինքնամեկուսացումից։–0–