Շոու բիզնեսի ներկայացուցիչները կառավարության դիմաց բողոքի ակցիա են կազմակերպել, կան բերման ենթարկվածներ (ՖՈՏՈ, ՎԻԴԵՈ)
14:38
20 Մայիսի 2020
ԵՐԵՎԱՆ, 20 մայիսի./Նովոստի–Արմենիա/. Ռեստորանների, հանդիսությունների սրահների սեփականատերերը, աշխատակիցները, երգիչները, երաժիշտները, հանդիսավարները և ոլորտի այլ ներկայացուցիչներ այսօր առավոտյան հավաքվել էին կառավարության շենքի մոտ` դիմելով ՀՀ պարետ Տիգրան Ավինյանին, որպեսզի իրենց ևս թույլ տալ գործունեություն ծավալել՝ պահպանելով անվտանգության կանոնները։
Ինչպես նշեց դերասան Սարգիս Գրիգորյանի կինը` Մանո Գրիգորյանը, երբ դուրս ես գալիս ու տեսնում ես, որ հիմնական բոլոր օղակներն աշխատում են, չես կարող հասկանալ, թե ինչու մոտավորապես մարտ ամսից աշխատանքի մեջ չես։
«Մեր աշխատանքը սեզոնային է, և այսպես պարապ վիճակը ճիշտ չէ ու չգիտես, թե դեռ որքան է այս ամենը տևելու։ Իմ մտահոգություններից մեկը նաև այն է, որ ստեղծված իրավիճակի լուծման համար հստակ ժամանակահատված չկա, և պարզ չէ՝ հետագա ընթացքը ինչպիսին կլինի», – նշեց Մանո Գրիգորյանն` ավելացնելով, որ պետք է գտնվի մի լուծում, որ այդ ոլորտի ներկայացուցիչները կարողանան մինիմալ չափով բավարարել իրենց պահանջները։
Ինչպես նշեց Մանո Գրիգորյանի ամուսինը` դերասան Սարգիս Գրիգորյանը, եթե բավականին լուրջ ու վտանգավոր ոլորտներ են բացվել, ինչու են նրանք տանը։
«Ինչու ենք մենք տանը, որքան ենք մենք մնալու տանը, այս հարցերի պատասխանները պետք է լինեն։ Մարդիկ ահռելի բեհեր են վերցրել, որոնց տակից ոնց պիտի դուրս գան, չգիտեմ։ Կամ եթե մենք տանն ենք օրինակ վարկային, վարձային, բեհային խնդիրները ոնց են լուծվելու։ Ես ստացել եմ 68 հազար դրամ 3 ամսվա համար, 3 աղջիկ ունեմ, հիմա ինձ ասեք` ինչ անեմ։ Եթե գրեթե ամեն ինչ բացվում ա, ինչու եմ ես տանը», – վրդոված նշել է Սարգիս Գրիգորյանը` ընդգծելով, որ նրանք բաց են քննարկման համար։
Հիշեցնենք, որ այսօր ռեստորանային համալիրների սեփականատերերն ու աշխատակիցները Կառավարության շենքի մոտ բողոքի ակցիա էին իրականացնում, որի ժամանակ ոստիկանները մասնակիցներից մի քանիսին բերման ենթարկեցին:
Ինչպես հայտնեցին Մարդու իրավունքների պաշտպանի գրասենյակից, Մարդու իրավունքների պաշտպանի հանձնարարությամբ արագ արձագանքման խումբ է մեկնել ՀՀ ոստիկանության Էրեբունիի բաժին՝ կապված Կառավարության շենքի մոտ բողոքի ակցիա իրականացնող ռեստորանային ոլորտի աշխատակիցներին բերման ենթարկելու հետ։
«Տեղի կունենան առանձնազրույցներ բերման ենթարկված քաղաքացիների հետ և կուսումնասիրվեն ապահովման վիճակը», – նշել են գրասենյակից։–0–
Հայաստանում 2023 թվականի հունվար-սեպտեմբերին ծնելիության մակարդակը, 2022 թվականի նույն ժամանակահատվածի համեմատ, աճել է 2,6 տոկոսով։ Այս մասին են վկայում Հայաստանի ազգային վիճակագրական կոմիտեի հրապարակած տվյալները