ԵՐԵՎԱՆ, 11 օգոստոսի./Նովոստի–Արմենիա/. Երևանի կենդանաբանական այգու անձնակազմը այգու մուտքի դիմաց իր բողոքն է արտահայտում տնօրենի նոր ժ/պ Արևիկ Մկրտչյանի նշանակման դեմ։
Բողոքի ցույցին ներկա էին նաև այգու նախկին աշխատակիցները, ովքեր ժամանակին պայքարել են այգու նախկին տնօրեն Ռուբեն Խաչատրյանին պաշտոնից ազատելու համար:
Բողոքի ակցիայի նախաձեռնողները պնդում են, թե Արևիկ Մկրտչյանն աշխատանքից հեռացված նախկին տնօրեն Ռուբեն Խաչատրյանի թիմից է:
«Մեր պահանջն այն է, որ Կենդանաբանական այգին չվերածվի խոտածածկի, ուզում ենք կենդանիներ տեսնել այստեղ, ոչ թե սրճարաններ, կարուսելներ»,-ասաց այգու աշխատակիցներից մեկը։
Աշխատակցուհու խոսքով՝ կենդանաբանական այգին քիչ-քիչ ոտքի էր կանգնում: Այսինքն նախկին կոռումպացված համակարգից դուրս էր գալիս, և մարդիկ ուզում էին նոր կենդանիներ բերել:
«Մարդիկ ուզում էին լավ բաներ անել, կենդանիներ բերեին, հիմա դա չի ստացվում։ Ուզում ենք հանգիստ աշխատել։ Մենք կսպասենք մի շաբաթ քաղաքապետարանի պարզաբանմանը։ Ամեն դեպքում, չեմ հավատում, որ իրենք գալիս են լավ բան անելու համար, եթե լավ բան էին անելու, ապա ինչո՞ւ 8 տարվա կառավարման ժամանակ չարեցին»,- ասաց աշխատակիցներից մեկը։
Կենդանաբանական այգու նախկին աշխատակից Անուշ Ռաֆայելյանն էլ ասաց, որ Արևիկ Մկրտչյանը նախկինում աշխատել է Կենդանաբանական այգում, այնուհետև հեռացվել աշխատանքից: Նա ներկայացրել է այգու միջազգային կապերը։ Սակայն, ինչպես պնդում է Ռաֆայելյանը, Արևիկ Մկրտչյանը կենդանիների հետ հաստատ կապ չունի։
«Դատարանի վճռով իրեն աշխատանքից ազատելու որոշումը արդարացի է եղել։ Որովհետև իր աշխատած տարիներին միջազգային կապերը ոչ մի օգուտ չեն բերել այգուն, բացի վնասից: Այդ միջազգային կապերի հիման վրա եղել են ոչ համարժեք կենդանիների բազմաթիվ փոխանակումներ։ Կա հարուցված քրեական գործ, որը 3 տարի է՝ քննվում է»,-նշեց Ռաֆայելյանը։
Այգու շահագործման բաժնի աշխատակից Սարգիս Շահրամանյանն իր հերթին նշեց, որ Ռուբեն Խաչատրյանի պաշտոնավարման տարիներին աշխատել է իր հետ, և վստահ է, որ նա մտադիր է վերականգնել իր պաշտոնը:
«Ես, Ռուբեն Խաչատրյանին ճանաչելով, վստահ ասում եմ՝ սա իր ձեռագիրն ա: Ուրիշ մարդ չկա՞, թող գա տնօրեն լինի, բայց ոչ թե հները: Մեր պահանջը այդքանն է», - ասաց Շահրամանյանը:
Այգու աշխատակիցները շարունակում են պնդել, որ Արևիկ Մկրտչյանը նախկին տնօրեն Ռուբեն Խաչատրյանի մտերիմն ու թիմակիցն է։ Նրանք կսպասեն ևս մեկ շաբաթ, որից հետո քաղաքապետարանից պարզաբանում կպահանջեն:–0–