«Զրկում են մի կտոր հացից». «Մալաթիա» տոնավաճառի աշխատակիցները բողոքում են տոնավաճառի փակման դեմ

ԵՐԵՎԱՆ, 1 փետրվարի./Նովոստի–Արմենիա/. Երևանի «Մալաթիա» տոնավաճառի առևտրի օբյեկտների վաճառողներն ու տերերն այսօր դուրս են եկել փողոց՝ բողոքելով տոնավաճառի փակման դեմ։

Ցուցարարները պնդում են, որ հրդեհային անվտանգության բոլոր աշխատանքները կարող էին իրականացվել շուկայի բնականոն գործունեությանը զուգահեռ։ Վաճառականներից ոմանք նշեցին, որ տոնավաճառում աշխատելն իրենց եկամտի միակ աղբյուրն է, ուստի պայքարը կշարունակեն այնքան ժամանակ, մինչև իրենց սոցիալական խնդիրները լուծվեն։

Օրերս ՀՀ քաղաքաշինական, տեխնիկական և հրդեհային անվտանգության տեսչությունը որոշեց ժամանակավորապես դադարեցնել տոնավաճառի գործունեությունը, քանի որ ստուգման արդյունքում հայտնաբերվել են հրդեհային անվտանգության խախտումներ։

Չնայած տնօրինության հավաստիացումներին, որ խախտումների մեծ մասը կվերացվի, երկրորդ ստուգումից հետո կարգավորիչը որոշել է փետրվարի 1-ից ժամանակավորապես դադարեցնել տոնավաճառի գործունեությունը։ Խոսակցություններ են շրջանառվում, որ իրականում որոշվել է շուկան ընդմիշտ փակել։ -0-