Հայաստանը մարդասիրական օգնություն ուղարկեց Լիբանան (ՖՈՏՈ, ՎԻԴԵՈ)

ԵՐԵՎԱՆ, 8 օգոստոսի․ /Նովոստի-Արմենիա/․  «Զվարթնոց» միջազգային օդանավակայանում բեռնավորվել է Լիբանան թռչող ինքնաթիռը, որը Հայաստանից մարդասիրական օգնություն կհասցնի Լիբանան:

«Սա երեք թռիչքներից առաջինն է և պարունակում է դեղորայք և բժշկական պարագաներ: Մենք ուղարկում ենք այն ամենը, ինչ մեզանից խնդրել է Լիբանանի կառավարությունը: Լինելով շատ նրբանկատ և, հիմնվելով մեր համայնքի շահերի վրա, մենք առաջին օգնություն ենք մատուցում լիբանանյան ժողովրդին, որպեսզի հարց չառաանա, թե ինչու է առանձին վերաբերմունք ցուցաբերվում հայ համայնքի, այլ ոչ թե լիբանանյան ամբողջ ժողովրդի նկատմամբ », - ասաց Սփյուռքի հարցերով գլխավոր հանձնակատար Զարեհ Սինանյանը:

Նա նաև նշեց, որ համայնքի համար նախատեսված երկրորդ ինքնաթիռը արդեն կունենա առանձին պարագաներ և սնունդ` այն ամենն ինչի կարիքը համայնքն ունի: Նրա խոսքով, երկրորդ չվերթը նախատեսված է օգոստոսի 11-ին: Սինանյանը նաև նշեց, որ Հայաստանը չի սահմանափակվի այս օգնությունով:

Միաժամանակ, հանձնակատարը նշել է, որ նախատեսվում է անցկացնել մի շարք հանդիպումներ, մասնավորապես, հայ համայնքի առանձին ներկայացուցիչների հետ, հասկանալու համար, թե որքան խորն է արմատացել Հայաստան հայրենադարձության գաղափարը:

Սինանյանն այս համատեքստում ասաց, որ որքան հնարավոր է շուտ ՀՀ գալու ցանկություն հայտնած և դեսպանատանը ցուցակարգված լիբանանահայերի թիվը 40 է։

Հիշեցնենք, որ oգոստոսի 4–ի երեկոյան հզոր պայթյուն է որոտացել Բեյրութի նավահանգստում։ Ինչպես ավելի ուշ հայտնեցին Լիբանանի ուժային կառույցները, դետոնացիայի է ենթարկվել մի քանի տարի առաջ նավերից մեկից բռնագրավված բեռում պահվող ամոնիումային սելիտրան։ Այս տարիների ընթացքում պայթյունավտանգ նյութը պահվել է նավահանգստի պահեստում` հետագայում այն ոչնչացնելու նպատակով։ Վերջին տվյալներով, կա 100–ից ավել զոհ, որոնց թվում` 11 հայ, վիրավորների թիվն անցնում է 4000–ը։–0–