ՀՀ նախագահը պարգևներ է հանձնել Բանակի օրվա առթիվ (ՎԻԴԵՈ)
22:04
27 Հունվարի 2020
ԵՐԵՎԱՆ, 27 հունվարի./Նովոստի-Արմենիա/. Բանակի օրվա առթիվ, Հանրապետության նախագահի հրամանագրերով, հայրենիքի պաշտպանության գործում ներդրած ավանդի, ծառայության ընթացքում ցուցաբերած խիզախության և նվիրումի համար մի խումբ զինվորներ, սպաներ, գեներալներ և ազատամարտիկներ պարգևատրվել են Հայաստանի Հանրապետության պետական բարձր պարգևներով: Այս մասին հայտնել է ՀՀ նախագահի մամուլի ծառայությունը:
Հանրապետության նախագահի հրամանագրերով մի խումբ բարձրաստիճան զինվորականների շնորհվել են նոր զինվորական կոչումներ:
Նախագահի մամուլի ծառայության հաղորդմամբ, հանրապետության նախագահի նստավայրում այսօր տեղի է ունեցել պետական բարձր պարգևների հանձնման հանդիսավոր արարողությունը, որին ներկա են եղել վարչապետ Նիկոլ Փաշինյանը, ԱԺ նախագահ Արարատ Միրզոյանը, այլ բարձրաստիճան պաշտոնյաներ:
Հանձնելով պետական բարձր պարգևները, շնորհավորելով և իր բարեմաղթանքները հղելով Բանակի օրվա առթիվ՝ նախագահ Արմեն Սարգսյանն առաջարկել է մեկ րոպե լռությամբ հարգել բոլոր նրանց հիշատակը, ովքեր իրենց կյանքը տվեցին այսօր հզոր ազգային բանակ ունենալու համար, իրենց կյանքը տվեցին դարեր առաջ, հարյուր տարի առաջ, Մեծ հայրենականում, Արցախյան ազատամարտում:
Նշելով, որ 1992թ. հունվարի 28-ին կառավարությունն ընդունել է «Հայաստանի Հանրապետության Պաշտպանության նախարարության մասին» ստեղծելու մասին որոշում, նախագահն ասել է, որ ազգային բանակը, ինչպես մեր անկախ պետականությունը, եղել է մեր երազանքը հարյուրավոր տարիներ:
«Ինչ -որ իմաստով գուցե նաև ոչ միայն երազել ենք, այլև պատրաստվել ենք այս օրվան, երբ ունենք հզոր բանակ»,- ասել է նախագահ Սարգսյանը, որպես այդ պատմական ընթացքի փայլուն օրինակներ նշելով Առաջին հանրապետության օրերը, Սարդարապատի, Բաշ Ապարանի, Ղարաքիլիսայի հերոսամարտերը, հաղթանակը Երկրորդ համաշխարհային պատերազմում և Հայրենական մեծ պատերազմում. ֆաշիզմի դեմ տարած այդ հաղթանակում չափազանց մեծ է հայ ժողովրդի ներդրումը, ի դեմս պատերազմին մասնակցած շուրջ 600 հազար զինվորների, որոնցից 300 հազարը չեն վերադարձել տուն, ի դեմս Խորհրդային Միության հայ հերոսների, գեներալների ու մարշալների:
«Մենք տարել ենք հաղթանակներ և ստեղծել հայոց բանակը, որը հաղթանակած բանակ է, տարածաշրջանի հզոր բանակը: Ասելով պետություն՝ մենք հասկանում ենք նաև բանակ, ասելով հզոր բանակ՝ հասկանում ենք հզոր պետություն»,- ընդգծել է նախագահ Սարգսյանը: -0-
Հայաստանում 2023 թվականի հունվար-սեպտեմբերին ծնելիության մակարդակը, 2022 թվականի նույն ժամանակահատվածի համեմատ, աճել է 2,6 տոկոսով։ Այս մասին են վկայում Հայաստանի ազգային վիճակագրական կոմիտեի հրապարակած տվյալները