ԵՐԵՎԱՆ, 23 հոկտեմբերի./Նովոստի–Արմենիա/. Փաստաբան Եվրանդ Վարոսյանը, որը պաշտպանում է խորհրդարանի աշխատակազմի ղեկավարի նախկին տեղակալի շահերը, կարծում է, որ Հայաստանի Հատուկ քննչական ծառայությունը դատարանից թաքցրել է իշխանությունը յուրացնելու քրեական գործով ՍԴ աշխատակազմի ղեկավարի ցուցմունքները։
Ավելի վաղ հայտնի է դարձել, որ ՀՀ հատուկ քննչական ծառայությունում քննվող քրեական գործի նախաքննության ընթացքում ձեռք բերված բավարար ապացույցների հիման վրա
Արսեն Բաբայանին մեղադրանք է առաջադրվել ՀՀ քրեական օրենսգրքի 38-300-րդ հոդվածի 1-ին մասով (Հանցակից լինել իշխանության յուրացման մեջ) և 314-րդ հոդվածի 1-ին մասով (Պաշտոնեական կեղծիքը) նախատեսված այն հանցավոր արարքների կատարման համար, որ նա, 2018 թվականին հանդիսանալով ՀՀ ազգային ժողովի աշխատակազմի ղեկավարի տեղակալի պաշտոնակատար, օժանդակել է մի խումբ պաշտոնատար անձանց կողմից ՀՀ սահմանադրական դատարանի լիազորություններին տիրանալուն, ինչպես նաև կատարել է պաշտոնեական կեղծիք։
«Մենք համոզված ենք, որ ՍԴ աշխատակազմի նախկին ղեկավարը նաև հարցաքննվել է քրեական գործով, այդ մասին կար նշում նաև իր հարցազրույցում, սակայն, ի զարմանս մեզ, այդ հարցաքննության արձանագրությունը մեզ չի տրամադրվել, դատարան էլ չի ներկայացվել»,- ասաց Վարոսյանը լրագրողներին դատարանի շենքի առջև, հայտնում է
aysor.am–ը։
Նա մի քանի պատճառներ առաջ բերեց։ «Որովհետև ակնհայտ արդարացնող ապացույց է։ Ասեմ ավելին, այսօր ուշադիր հետևել եմ նաև պարոն Բաբլոյանի հարցազրույցին, ինչպես նաև Գագիկ Հարությունյանի հարցազրույցին։ Այդ երեք անձանց դիրքորոշումները բավարար են պնդելու համար, որ ներկայացված մեղադրանքն իրականաության հետ որևէ աղերս ունենալ չի կարող»,– կարծում է իրավաբանը։
Ըստ Վարոսյանի, ամենայն հավանականությամբ, դատարանն այսօր երկու հարցերը միաժամանակ կքննարկի՝ և՛ ձերբակալման իրավաչափության դեմ մեր կողմից ներկայացված բողոքը, և՛ վարույթ իրականացնող մարմնի միջնորդությունն՝ Արսեն Բաբայանի նկատմամբ կալանավորումը որպես խափանման միջոց ընտրելու մասին։
Սահմանադրական դատարանի նախկին նախագահ
Գագիկ Հարությունյանը հերքել է, թե անցած տարի իրեն պարտադրել են սահմանված ժամկետից շուտ հրաժարական ներկայացնել, որպեսզի Հայաստանի հանրապետական կուսակցության անդամ Հրայր Թովմասյանը հնարավորություն ստանա ՍԴ նախագահ դառնալ մինչև 2015 թվականի սահմանադրական փոփոխությունների ամբողջությամբ ուժի մեջ մտնելը։
Նախօրեին Հայաստանի հատուկ քննչական ծառայությունը հայտարարել է Հայաստանի ԱԺ նախկին խոսնակ Արա Բաբլոյանին պետական իշխանությունը յուրացնելու հոդվածով որպես կասկածյալ ներգրավելու մասին։
Մինչդեռ
Բաբլոյանն ասել է, որ ինքը ստորագրել է դիմումն ամսի 2–ին, երբ իր առջև եղել է Գագիկ Հարությունյանի` մարտի 1–ով թվագրված հրաժարականի դիմումը։
«Մնացածը թող իևավապահ մարմինները որոշեն։ Ես ինքս գիտեմ, որ գործել եմ Սահմանադրության և օրենքի սահմաններում։ Չեմ կարող պատասխան տալ, թե Գագիկ Հարությունյանն ինչու է շուտ դիմում գրել»,– հավելել է Բաբլոյանը։ -0-
