ԵՐԵՎԱՆ, 18 հունվարի․ /Նովոստի-Արմենիա/․ Մինչև ապրիլի 1-ը գազի գինը չի բարձրանա, այս մասին այսօր լրագրողներին հայտնել է Հանրային ծառայությունները կարգավորող հանձնաժողովի նախագահ Գարեգին Բաղրամյանը։
Նոյեմբերի 19-ին ՀՀ վարչապետ Նիկոլ Փաշինյանը ևս նշել էր, որ մինչև 2020 թ․-ի գարուն գազի գնի թանկացում չի սպասվում։ Բաղրամյանն ասել է, որ սահմանին գազի գինը բարձրացել է 15 դոլարով և «Գազպրոմ Արմենաիան» այլևս ի վիճակի չէ այդ գումարը կոմպենսացնել։ Սակայն, նրա խոսքով, դա չի նշանակում, որ գազի սակագինը բարձրանալու է։
«Այսինքն գործող սակագների մասով շուրջ 30 դոլարի ավելացման խնդիր է՝ ֆինանսական կարողությունների։ 30 դոլարով ավելի շատ են ծախսվելու և գործող սակագներն այդքանով չեն բավարարում, բայց դա չի նշանակում, որ 30 դոլարով ունենալու ենք սակագնի բարձրացում, որովհետև այս տարվա ընթացքում բանակցում ենք»,- ասել է Բաղրամյանը։
Նա նշել է, որ բանակցվում են ընկերության օպտիմալացման, ծախսերի հնարավոր կրճատման խնդիրները, ինչպես նաև երկարաժամկետ մինչև 2030 թ․-ի գազափոխադրման համակարգի կապիտալ ներդրումների ծրագիրը, որը շուրջ 500 մլն դոլար է։ Բաղրամյանի կարծիքով մինչև ապրիլի 1-ը բանակցությունները կավարտվեն։ Այսինքն, մինչ այդ գազի բարձրացման հայտ ընկերության կողմից չի ներկայացվի։ Ժամկետների մասին խոսելիս, Բաղրամյանը նաև նշել է, որ հայտը քննարկելու համար տրվում է 80 օր, որից հետո արդեն, հայտնի կլինի գազի սակագինը։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում