ԵՐԵՎԱՆ, 11 մայիսի./Նովոստի-Արմենիա/. ՀՀ նախկին վարչապետ Կարեն Կարապետյանը երկուշաբթի մասնակցել է Ազգային ժողովի 2016թ.-ի Ապրիլյան պատերազմի հարցով քննիչ հանձնաժողովի նիստին և պատասխանել պատգամավորների հարցերին:
«Շատ աշխատանքային քննարկում էր: Ես պատասխանում էի բոլոր այն հարցերին, որոնք հանձնաժողովն ուղղել է, քանի որ հանձնաժողովը փակ է և դա համարվում է պետական գաղտնիք, այդ պատճառով ավել բան ասել չեմ կարող»,- նշել է նա՝ պատասխանելով լրագրողների հարցերին:
Իր հերթին ԱԺ քննիչ հանձնաժողովի նախագահ Անդրանիկ Քոչարյանը լրագրողների հետ զրույցում հայտնել է, որ Կարապետյանին տրվել է հարցերի լայն շրջանակ, որոնք առնչվել են ապրիլյան պատերազմին, ինչպես նաև 2016-2018թթ.-ին կառավարության հետագա աշխատանքներին՝ խնդիրների լուծման վերաբերյալ, որոնք դրսևորվել են ռազմական գործողությունների ըթնացքում:
«Քննարկումը կարճ տևեց: Կախված էր նրանից, թե Կարեն Կապետյանը ինչքանով կարող էր տիրապետել այդ հարցերի բովանդակությանը: Մեզ համար շատ կարևոր են կառավարությունների ժառանգականությունը, փոխանցված ինֆորմացիայի և դրանց հետ կապված խնդիրների լուծված լինելը կամ ապագային միտված քայլերը»,- նշել է նա:
Մասնավորապես, Քոչարյանի խոսքով, կոմիտեի համար կարևոր էր պատասխաններ ստանալ Կարապետյանի օրոք կառավարության ձեռնարկած քայլերի մասին՝ ապրիլյան պատերազմի հետևանքների վերացման վերաբերյալ, ինչպես նաև պարզելը 2017թ.-ի մարտին նախկին վարչապետի կողմից արված հայտարարությանը՝ Բանակին մատակարարվող վառելիքի խնդրի վերաբերյալ:
«Նա այդ տեսակետը հայտնել էր 2017 թվականի մարտի 1-ին և 2017 թվականի մարտի 13-ին և մեզ հետաքրքրիր էր՝ Կառավարությունն այդ տեսակետների հետ կապված ինչ հանձնարարական է իջեցրել իրավապահ համակարգին, որպեսզի ճշտեին՝ ով է փոխանցել և դա ճշտեցինք»,- նշել է նա:
«Ինչու հրավիրեցինք Կարեն Կարապետյանին, որովհետև նա կառավարությունը ձևավորել է ապրիլյան դեպքերից հետո, և կարծում ենք, որ այդ կառավարությունն իր առաջնահերթությունների մեջ, բացի տնտեսական խնդիրներից, պետք է ուշադրություն դարձներ նաև անվտանգային խնդիրներին»,- նշել է հանձնաժողովի նախագահը:
Ինչպես նշել է Քոչարյանը, իրենք չեն առաջնորդվելու միայն նախկին պաշտոնյաների ցուցմունքներով, այլև կարևորություն են տալիս հանձնաժողով այցելած ռազմական գործիչների տրամադրված տեղեկություններին, ինչպես նաև փաստագրական բազային:
2016 թ.-ի ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտայի նմիջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։-0-
