Թովմասյանի դստեր մասին «Իմ քայլի» անդամի գրառման շուրջ սկանդալը նոր թափ է հավաքում. արձագանքել է Օմբուդսմենը

ԵՐԵՎԱՆ, 27 հունվարի./Նովոստի-Արմենիա/. ՀՀ մարդու իրավունքների պաշտպան Արման Թաթոյանը խստորեն քննադատել է Հրայր Թովմասյանի դստեր նկատմամբ «Իմ քայլը» խմբակցության անդամ Հենրիկ Հարթենյանի արարքը:

Հիշեցնենք, որ նախօրեին Երևանի ավագանու «Իմ քայլը» խմբակցության անդամ Հենրիկ Հարթենյանն իր Facebook-յան էջում տեղադրել է Հրայր Թովմասյանի դստեր Facebook-յան էջը՝ գրելով. «Հ. Թովմասյանի աղջկա ֆբնա, դե ձեզ տեսնեմ ժողովուրդ ջան»: Այնուհետև գրառումը ջնջել է իր էջից:

Ինչից հետո ՀՀ մարդու իրավունքների պաշտպան Արման Թաթոյանն իր Facebook-յան էջում գրառում է կատարել՝ խստորեն դատապարտելով նմանատիպ արարքը:

«Խստորեն դատապարտելի, բացարձակ մերժելի է Երևանի ավագանու անդամ Հենրիկ Հարթենյանի արարքը՝ կապված Հրայր Թովմասյանի դստեր հետ։ Ու առհասարակ, հանրային պաշտոն զբաղեցնող ցանկացած անձից խիստ պահանջում եմ հստակ գիտակցել իր պաշտոնական կարգավիճակը և գործել բացառապես այդ կարգավիճակի սահմաններում, դրսևորել պատշաճ վարքագիծ։ Դուք սահմանափակված եք ձեր պաշտոնական կարգավիճակով»,- նշել է նա:

Մասնավորապես, Օմբուդսմենն ընդգծել է, որ որևէ մեկն իրավունք չունի թիրախավորել ընտանեկան կյանքն ու առավել ևս երեխաների ու լարվածությունն ուղղել այդ կողմ՝ անկախ նրանից պաշտոնյայի ընտանիքի մասին է խոսքը, թե ոչ։

«Սոցիալական ցանցերի օգտատեր մեր հայրենակիցներին խնդրում եմ հարգանքով վերաբերվել իրար, հարգանքով վերաբերվել միմյանց կարծիքի ու արժանապատվության նկատմամբ, անձնական ու ընտանեկան կյանքի նկատմամբ»,- հայտնել է Թաթոյանը:

Հավելենք, որ նախօրեին Երևանի ավագանում «Իմ քայլը» խմբակցությունը նույնպես դատապարտելի էր համարել ատելության խոսքի նման դրսևորումը և հայտնել այսօր գումարվելիք հրատապ նիստի մասին, որը տեղի է ունենում հիմա:

«Երևանի ավագանու «Իմ քայլը» խմբակցությունը խստորեն դատապարտում է ատելության խոսքի ցանկացած դրսևորում: Հայցում ենք ձեր ներողամտությունը կատարվածի առթիվ: Վաղը Երևանի ավագանու «Իմ քայլը» խմբակցությունը կգումարի հրատապ նիստ, որից հետո հանդես կգա հայտարարությամբ»,- նշվում է տարածված հաղորդագրության մեջ։ -0-