ԵՐԵՎԱՆ, 29 հունիսի./Նովոստի–Արմենիա/. Երևանում հուլիսին կբացվի առաջին ավտոկինոթատրոնը բաց երկնքի տակ:
Այս մասին հայտնում է
PanARMENIAN.Net–ը` հղում անելով կազմակերպիչներին։
Կազմակերպիչները նշում են, որ կորոնավիրուսի հետևանով ստեղծված պայմաններում նման կինոթատրոնի կարիքն ավելի է զգացվում:
Ավտոկինոթատրոնը կբացվի մինչև հուլիսի կեսերը, հստակ օրը դեռ հայտնի չէ:
Այն նախատեսված կլինի 82 ամտոմեքենայի համար: Պլանավորվում է օրական երկու կինոդիտում անցկացնել. ցուցադրվելու են թե միջազգային կինոպրեմիերաներ, թե այլ ֆիլմեր: Հանդիսատեսը ֆիլմի ձայնը լսելու է անմիջապես իրենց մեքենայի ներսում՝ բարձրախոսներից:
Կազմակերպիչների խոսքերով, ֆիլմերի ցուցադրությունները լինելու են երեկոյան: Ցուցադրվելու են կինոպրեմիերաներ, շաբաթվա մեջ կլինեն օրեր, երբ արտհաուսային ֆիլմեր կցուցադրվեն: 14 մետրանոց էկրան կլինի:
Կազմակերպիչները նշում են, որ տոմսի արժեքը կլինի 6000 դրամ 1 մեքենայի համար՝ անկախ դրանում գտնվող անձանց քանակից:
Տարածքում կգործի նաև սննդի կետ, որտեղից պատվեր կարելի է անել անմիջապես ավտոմեքենայի միջից կինոդիտումից առաջ կամ ընթացքում՝ գրելով ավտոկինոթատրոնի վեբկայքի կամ ֆեյսբուքյան էջի չատբոտին:
Կազմակերպիչները նաև նշում են, որ զվարճանքի վայրի համար 5000 քմ տարածք է առանձնացվել: Այն գտնվում է ձորում, գետի ափին, կարելի է «քաղաքից դուրս» ֆորմատով հանգիստ անցկացնել վրաններով և այլն:–0–