ԵՐԵՎԱՆ, 16 փետրվարի. /Նովոստի-Արմենիա/. Հայ մեծ կոմպոզիտոր և երգահան Կոմիտասի 150-ամյակին նվիրված հոբելյանական միջոցառումների շրջանակում Կամերային երաժշտության ազգային կենտրոնը կներկայացնի համերգաշար, որի ընթացքում կհնչեն ինչպես հայտնի, այնպես էլ նախկինում չհնչած ստեղծագործություններ: Այդ մասին նախօրեին կայացած մամուլի ասուլիսում հայտնեց կենտրոնի տնօրեն Նորայր Նազարյանը:
«Կոմիտասին նվիրված միջոցառումները մեկնարկում են փետրվարի 20-ին Հայաստանի պետական կամերային նվագախմբի համերգով: Կհնչեն ինչպես երգչախմբային, այնպես էլ մեներգեր, դաշնամուրի համար ստեղծագործություններ»,- ասաց Նազարյանը:
Կոմիտասյան դպրոցի ստեղծման նախադրյալներ
Հայաստանի պետական կամերային նվագախմբի գեղարվեստական ղեկավար և գլխավոր ռեժիսոր Ռոբերտ Մլքեյանը նշեց, որ ամբողջ տարվա ընթացքում կներկայացվեն Կոմիտասի բազմաձայն և գործիքային ստեղծագործություններ:
Ինչպես նշեց Մլքեյանը, ամբողջ աշխարհը պետք է իմանա և լսի, որ հայ ժողովուրդն ունի անգնահատելի կոմպոզիտոր, ով կարողացել է ազգային երաժշտությունը բարձրացնել ակադեմիական երգչախմբային արվեստի մակարդակի:
«Ցավոք, չնայած դրան, մենք չկարողացանք ստեղծել կոմիտասյան կատարողների դպրոց, ինչպես Բախի, Մոցարտի, Բեթհովենի և այլոց դեպքում: Հուսանք, որ մեր համերգների շնորհիվ մենք կստեղծենք այդ դպրոցի ձրևավորման հիմք»,- ասաց նա:
Կոմիտասի մասին
Կոմիտասը հայ երգահան է, երգիչ, երաժշտական էթնոլոգ, երաժշտագետ, վարդապետ և ուսուցիչ, բանահավաք, խմբավար, մանկավարժ, հայկական ազգային կոմպոզիտորական դպրոցի հիմնադիր:1881-1893 թթ. սովորել է Էջմիածնի Գևորգյան ճեմարանում: 1894 թ. ձեռնադրվել է աբեղա և ստացել Կոմիտաս անունը։ 1895 թ. Կոմիտասին շնորհվել է վարդապետի հոգևոր աստիճան։
Հայոց ցեղասպանության ժամանակ՝ 1915 թվականի ապրիլին, շատ այլ հայ մտավորականների հետ մեկտեղ օսմանյան կառավարության կողմից Կոմիտասը ձերբակալվում է և արտաքսվում բանտարկյալների ճամբար: Նրան շուտով ազատում են անհայտ հանգամանքներում, որից հետո ստանում է հոգեկան խանգարում և նրա մոտ ձևավորվում է հետվնասվածքային սթրես:
Կոստանդնուպոլսի ատելության մթնոլորտը և հայերի զանգվածային կոտորածների մասին լուրերը շարունակում են խաթարել նրա զգայուն հոգեկան վիճակը: Մինչև 1919 թվականը նրան սկզբում տեղավորում են թուրքական ռազմական հոսպիտալում և ապա՝ տեղափոխում Փարիզիհոգեբուժարաններ, որտեղ էլ տառապանքների մեջ անց է կացնում իր կյանքի վերջին տարիները:
Կոմիտասի անունն են կրում, մասնավորապես, Երևանի պետական կոնսերվատորիան, լարային քառյակը, Կամերային երաժշտության տունը, պողոտան, այգին, Ստեփանակերտի երաժշտական դպրոցը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում