ԵՐԵՎԱՆ, 3 օգոստոսի./Նովոստի–Արմենիա/. Հայոց ցեղասպանության մասին պատմող «Խոստումը» ֆիլմն օգոստոսի 8–ից հասանելի կլինի Netflix հայտնի սթրիմինգային սերվիսում, հաղորդում է Ամերիկայի հայկական համագումարը (Armenian Assembly of America)։
Նշվում է, որ սկսած 2016թ.–ից համագումարը կազմակերպել է ֆիլմի ցուցադրություններ Հարավային Կալիֆոռնիայի, Մերիլենդի և Մասաչուսեթսի համալսարանների ուսանողների և դասախոսների համար։
Վերջին երկու տարում համագումարը Շոայի հիմնադրամի հետ համագործակցությամբ (USC Shoah Foundation, որը զբաղվում է Հոլոքոստի վկաների և փրկվածների տեսավկայությունների ձայնագրությամբ) տարրական դպրոցների ուսուցիչների համար կազմակերպել է սեմինարները` Ցեղասպանության հարցերի մասին իրազեկելու նպատակով։
«Խոստումը» ֆիլմի համաշխարհային պրեմիերան տեղի է ունեցել 2016թ.–ին Լոս Անջելեսում: Ֆիլմի հովանավորն է ամերիկահայ միլիարդատեր Քըրք Քըրքորյանը, ում նախնիները փրկվել են Հայոց ցեղասպանության ժամանակ։
Ֆիլմի ռեժիսոր Թերի Ջորջն առաջադրվել է Օսկարի «Ռուանդա» ֆիլմի համար, գլխավոր դերերում են Օսկար Այզեքը, Քրիստիան Բեյլը և Շարլոտ լե Բոնը: Կինոյի երաժշտության հեղինակը աշխարհահռչակ «System of a down» խմբի մենակատար Սերժ Թանկյանն է:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում