ԵՐԵՎԱՆ, 9 հուլիսի./Նովոստի–Արմենիա/. Կառավարությունը լուրջ փոփոխություններ է կատարել կորոնավիրուսի հետևանքների չեզոքացմանն ուղղված առաջին միջոցառման մեջ։ Այս մասին տեղեկացրեց փոխվարչապետ Մհեր Գրիգորյանը, հաղորդում է
«ԱՌԿԱ» տնտեսական լրատվության գործակալությունը։
Загружается новость ... "Лево"
Կառավարության առաջին ծրագիրը վերաբերում է բիզնեսին օժանդակելուն, մասնավորապես, պետական աջակցության շրջանակում ֆինանսավորման չափը կարող է լինել մինչև 500 մլն դրամ: Այս գործիքն իր ընդգրկման շրջանակով ամենալայնն է, այն վերաբերում է ՀՀ-ում վերջին 1 տարվա ընթացքում գործող բոլոր իրավաբանական, ֆիզիկական անձանց և անհատ ձեռնարկատերերին, առանց գործունեության ոլորտի սահմանփակումների։ Նախատեսվում է միայն մեկ պայման. նրանք պետք է ունենան վարկային և հարկային դրական պատմություն:
«Հունիսի 20-ից ուժի մեջ է մտել մեկ կանոն, որը շատ կարևոր ռազմավարական կանոն է: Մինչ օրս մեր սուբսիդավորման գործիքն աշխատում էր հետևյալ տրամաբանությամբ` մինչև 250մլն դրամ վարկային ռեսուրսները սուբսիդավորվում էր մինչև 1 տարի ժամկետով։ Մենք ուժի մեջ ենք մտցրել հետևյալ սահմանումը, որ եթե ձեռնարկությունը, տնտեսվարողը 50մլն դրամի չափով կանոնադրական կապիտալի համալրում է իրականացրել կամ կիրականացնի 2020 թվականի ընթացքում, ապա նա հնարավորություն է ստանում հավելյալ սուբսիդավորվել 400մլն դրամի չափով և 36 ամիս ժամկետով, որը շատ էական է», – ասաց Գրիգորյանը։
Բացի այդ, եթե համալրումն իրականացվել է 100մլն դրամի չափով, ապա տնտեսվարողը հնարավորություն ունի ստանալ 500մլն դրամին համարժեք սուբսիդավորում` 48 ամսվա համար:
Իշխանություններն ընդհանուր առմամբ հաստատել են կորոնավիրուսի հետևանքների չեզոքացման 22 միջոցառում։ Դրանց մի մասը վերաբերում է աջակցությանը բիզնեսին (գյուղատնտեսություն, տուրիզմ, ՓՄՁ, միկրոբիզնես, ՏՏ և այլ ոլորտներ), մյուսներն ուղղված են սոցիալական աջակցությանը, ևս մեկ միջոցառում բնապահպանական է։ Որոշ ծրագրեր արդեն ավարտվել են, որոշներն էլ դեռ ընթացքի մեջ են, և կառավարությունը քննարկում է աջակցության նոր հնարավորություններ։–0–
