ՀՀ-ում կորոնավիրուսի կանխարգելման և հաղթահարման ապահովման համար հատուկ հաշվին փոխանցվել է մոտ 856,2 մլն. դրամ

ԵՐԵՎԱՆ, 2 ապրիլի․ /Նովոստի-Արմենիա/․ Ապրիլի 2-ի ժամը 18:00-ի դրությամբ կորոնավիրուսային վարակի կանխարգելման և հաղթահարման ապահովման համար բացված հատուկ հաշվի մուտքերը կազմել են 856,2 մլն դրամ: Այս մասին հայտնում է ՀՀ կառավարության մամուլի ծառայությունը Ֆինանսների նախարարության տեղեկատվության հիման վրա, հաղորդում է armbanks.am ֆինանսաբանկային պորտալը:
  
«ՀՀ ֆինանսների նախարարությունը տեղեկացնում է, որ 17.03.2020թ. գանձապետարանում բացված «Ֆիզիկական անձանց և կազմակերպությունների նվիրաբերությունից պետությանը, կորոնավիրուսային վարակի (COVID-19) կանխարգելման և հաղթահարման ապահովման համար ֆինանսական աջակցություն» հաշվին 01.04.20թ. ժամը 18:00-ի դրությամբ մուտքերը կազմել են 856,253,000 դրամ, իսկ մուտքերի ընդհանուր քանակը 3239»,- նշվում է տարածված հայտարարության մեջ:

Նշենք, որ ապրիլի 2–ի դրությամբ Հայաստանում հաստատվել է կորոնավիրուսով վարակման 92 նոր դեպք, ընդհանուր` 663 դեպք։

Բուժվել է 33 մարդ, այս պահին փաստացի բուժում է ստանում 626 մարդ, բացասական թեստերի թիվը` 2940, մահացել է 5 մարդ։-0-