ԵՐԵՎԱՆ, 7 հունվարի./Նովոստի–Արմենիա/. Այսօր ցուցարարները ներխուժել են ԱՄՆ Կոնգրեսի շենք, որի երկու պալատները նախագահական ընտրությունների արդյունքների հաստատման համատեղ նիստի դադարեցումից հետո քննարկում էին Արիզոնա նահանգում անցկացված քվեարկության դեմ առարկությունները։ Այդ մասին հայտարարել է վերին պալատի նիստում նախագահող սենատոր Ջեյմս Լենքֆորդը, գրում է ՏԱՍՍ–ը։
«Ցուցարարները Կոնգրեսի շենքում են», – ընդգծել է նա` ավելացնելով, որ Սենատն ու Ներկայացուցիչների պալատը հեռանում են ընդմիջման։
MSNBC հեռուստաալիքն ավելի վաղ հաղորդել է, որ ԱՄՆ Կոնգրեսի շենքը շղթայվել է ոստիկանության կողմից, քանի որ ԱՄՆ նախագահ Դոնալդ Թրամփի կողմնակիցները փորձում են գրոհել շենքը։ Հեռուստաալիքի հաղորդմամբ, օրենսդիրներին տարհանել են անվտանգ վայր։
ԱՄՆ գործող նախագահ Դոնալդ Թրամփի կողմնակիցները քանդել են Կապիտոլիումի շենքի մոտ տեղադրված ցանկապատը, ինչի հետևանքով բախում է սկսվել ոստիկանների հետ, հաղորդում է Fox News հեռուստաալիքը։
Ոստիկանությունը կիրառում է արցունքաբեր գազ Կոնգրեսի շենքում ցուցարարներին ցրելու համար, հաղորդում է CBS–ը։
Հաղորդվում է, որ ոստիկանները որոշել են տարհանել մոտակա երկու շենքերի բնակիչներին այն բանից հետո, երբ այդ շենքերի մոտ հայտնաբերվել են կասկածելի փաթեթներ։–0–