ԵՐԵՎԱՆ, 24 հունվարի./Նովոստի–Արմենիա/. Օրեր առաջ հայ հասարակությունը ցնցվեց ահասարսուռ լուրից` Արմավիրում 13 տարեկան աղջիկը երեխա է ունեցել սեփական հայրիկից։
Ինչպես հաղորդել էր Քննչական կոմիտեն, կատարվել են անհրաժեշտ քննչական և դատավարական գործողություններ՝ հարցաքննվել են մի շարք անձինք, վերցվել են արյան փորձանմուշներ, նշանակվել դատագենետիկական փորձաքննություններ, որոնց արդյունքների համաձայն՝ երեխայի հայրը հանդիսանում է անչափահաս աղջկա հայրը, ով ձերբակալվել է:
Ինչպես հաղորդում է «Ազատություն» ռ/կ–ն, հղում անելով Քննչական կոմիտեի Արմավիրի մարզային քննչական վարչության ավագ քննիչ Նարեկ Մհերյանին, որևէ անձի համընկնում չի հայտնաբերվել, միայն հայրիկի համընկնումն է եղել, այսինքն՝ մնացած բոլոր անձանց հայրությունը բացառվել է:
Ոստիկանությունը նախորդ տարվա ամռանն էր ահազանգ ստացել, որ բուժօգնության է դիմել 23 շաբաթական հղի՝ 13 տարեկան։ Աղջիկը «Ազատությանը» պատմում էր, որ բռնության է ենթարկվել դպրոցում համադասարանցիների կողմից, նույնը քննիչներին է ասել:
Քննիչի խոսով, նշանակվել է դատագենետիկական փորձաքննություն, և համաձայն փորձաքննության եզրակացությունների՝ նշված անձանց հայրությունը նորածին երեխայի նկատմամբ բացառվել է:
Ստուգվել է նաև եղբոր վարկածը, որը հերքվել է, ապա տեղեկություններ են ստացել, որ բռնարարը կարող է հայրը լինել։ Անցկացվել են գենետիկական փորձաքննություններ, նորածնից էլ արյան նմուշ է վերցվել, որոնց արդյունքում հաստատվել է, որ աղջկան հղիացրել է սեփական հայրը։
Քննիչի տեղեկացմամբ՝ տղամարդը հաշվառված է մարզի բուժհաստատություններից մեկում՝ ախտորոշումը մտավոր հետամնացություն, օլիգոֆրենիա։
«Նշանակվելու է համապատասխան փորձաքննություն վերջինիս նկատմամբ՝ հասկանալու համար նրա մեղսունակության աստիճանը, այսինքն՝ վերջինս մեղսունակ է, թե անմեղսունակ: Համապատասխան բոլոր անհրաժեշտ քննչական գործողություններն իրականացվելու են», - նշել է Մհերյանը:
Աղբյուրի հաղորդմամբ, ընտանիքում ավագ երեխան՝ էլի հաշմանդամությամբ, հատուկ հաստատությունում է: Հաշմանդամություն ունի նաև հղիացած դեռահասը։ Նրա մայրը չի հավատում, որ ամուսինն է բռնության ենթարկել իրենց երեխային, ասում է՝ «թող աչքիս առաջ անալիզներ անեն»:
«Ես չգիտեմ, ես գժվեմ գը, ես չեմ պատկերացնում, ես ասում եմ՝ հենց հիմա թող էթան, իմ ամուսնուն տանին, նրանց էլ բերեն, էն երեխուց էլ, փոքր երեխուց էլ թող անալիզների պատասխանը գա, էլի թող գա իմ ամուսնուն, ես տնով-տեղով կեթամ, կնստիմ, վերջին վարյանտ ես տենց կանեմ, լիշբը ամեն ինչն իմ աչքի դեմը լինի», - ասում է նա:
Կինը պնդում է՝ ամուսինը հոգեկան խնդիրներ ունի, առիթից օգտվում են. «Մանկուց մտավոր հետամնաց է անժամկետ, որ իրան թոշակով հանել են, կարգի թղթի մեջ տենց ա գրված, սկի բանակ էլ չի գնացել»:
Քննչական կոմիտեից պնդում են՝ ստուգվել են բոլոր հնարավոր տարբերակները, միակ գենետիկ համընկնումը հոր դեպքում է եղել։ Իսկ փոքրիկը, որ ծնվել է ամռան վերջին, տղա է, կրում է ծնունդն ընդունող բժշկի՝ Դավիթ Աբովյանի անունը։ Արդեն կես տարեկան երեխան դեռ մանկատանն է։ Ընտանիքում ասում են՝ տուն-տանիք, պայմաններ չունեն, մայրիկն էլ դպրոցական է:–0–