Երևանում մի խումբ դեռահասներ մահակներով և քարերով հարվածել են միմյանց. 6 պատանի բերման է ենթարկվել

ԵՐԵՎԱՆ, 16 նոյեմբերի./Նովոստի–Արմենիա/. Նոյեմբերի 14-ին, ժամը 11-ին, ոստիկանություն է զանգահարել անհայտ քաղաքացի և հայտնել, թե մոտ տասը րոպե առաջ Տիտոգրադյան փողոցում մոտ տասը հոգով մի երեխայի են ծեծել, հաղորդում է ՀՀ ոստիկանության մամուլի ծառայությունը:
Մեկնել է ոստիկանության Էրեբունու բաժնի օպերատիվ խումբը:

«Բաժնի քրեական հետախույզների և անչափահասների գործերով տեսուչների համատեղ միջոցառմամբ պարզվել է, որ վիճաբանության ժամանակ 16-17 տարեկան տղաներ, մեծ մասամբ «Էրեբունի» պետական բժշկական քոլեջի ուսանողներ, և մի քանի անհայտ անձինք, կոպիտ կերպով խախտելով հասարակական կարգը, մահակներով ու քարերով հարվածներ են հասցրել միմյանց, հնչեցրել են հայհոյանքներ և վնասել կայանված «Տոյոտա Քեմրի» մեքենան, – նշվում է գերատեսչության հաղորդագրության մեջ:

Խուլիգանություն կատարելու կասկածանքով վեց պատանի բերման է ենթարկվել բաժին և տվել բացատրություն: Հանգամանքները պարզվում են, նախապատրաստվում են նյութեր:–0–