ԵՐԵՎԱՆ, 18 հունվարի./Նովոստի-Արմենիա/. Պատերազմից հետո Արցախի միջազգային մեկուսացումը խորացել է, և Ադրբեջանն իր բոլոր ջանքերը գործադրում է այդ ուղղությամբ։
Այս մասին ասաց Արցախի պետնախարար Արտակ Բեգլարյանը իր ամենամյա մամուլի ասուլիս ժամանակ։
«Մինչև հիմա ԵԱՀԿ ՄԽ համանախագահները չեն այցելել Լեռնային Ղարաբաղ, շնորհիվ Ադրբեջանի։ Նույնը ՄԱԿ-ի փախստակաների հարցերով գերագույն հանձնակատարի վարչության, ԵԽ մարդու իրավունքների հանձնակատարի պարագայում է։ Այսինքն՝ դա վերաբերում է բոլոր նրանց, ովքեր հայտարարում էին Արցախ այցելելու պատրաստակամության մասին»,- ընդգծեց Բեգլարյանը։
Արցախի պետնախարարի խոսքով՝ ափսոսանքի է արժանի, որ միջազգային կազմակերպությունները ենթարկվում են Ադրբեջանի անօրինական, անմարդկային քայլերի, մանավանդ որ նրանց գործառույթների մեջ են մտնում մարդու իրավունքների պաշտպանությունն ու հումանիտար հարցերի լուծումը։
«Մարդու իրավունքները պետք է գերակա լինեն։ Միջազգային կազմակերպությունները պետք է ավելի համարձակ լինեն։ Օմբուդսմենի իմ փորձը վկայում է նրանց համարձակության պակասի մասին», – ասաց ԱՀ պետնախարարը։
Բեգլարյանի դիտարկմամբ, համանախագահների հասցեին Ադրբեջանի նախագահի ծաղրից հետո, այդ երկրները պետք է առանց Ադրբեջանի կարծիքը հաշվի առնելու ոչ միայն Արցախ այցելեին, այլև ճանաչեին եթե ոչ անկախությունը, ապա գոնե Արցախի ժողովրդի ինքնորոշման իրավունքի իրականացման փաստը, հատկապես պատերազմից հետո:
«Որովհետև պատերազմի հետևանքով բոլոր հիմնական քննարկվող հարցերը կամ լուծված են, կամ ոտնահարված, բացի ինքնորոշման իրավունքից։ Իսկ որքան ավելի շատ նրանք հետևեն վախկոտ քաղաքականությանը, այնքան ավելի շատ Ադրբեջանը կլկտիանա»,- ընդգծեց պետնախարարը։
Նա հավելեց նաև, որ առաջին անգամը չէ, որ Ալիևը ծաղրում է համանախագահներին, ընդ որում ոչ միայն ծաղրում է, այլև նվաստացնում։ Նրա խոսքով՝ համանախագահները պետք է անցնեն կոշտ միջոցների։
«Նրանք պետք է խոսեն ոչ թե հաշտարարի, այլ «արբիտրի» դիրքերից։ Եթե նույնիսկ Ադրբեջանն ասում է, որ հակամարտությունը կարգավորված է, բոլորը հասկանում են, որ իրավիճակը միայն խորացել է։ Եվ եթե Ադրբեջանը չի ցանկանում կապ հաստատել միջազգային հանրության հետ, ապա միջազգային հանրության կողմից պետք է լինեն միակողմանի որոշումներ»,- նշեց Բեգլարյանը։
Նրա խոսքով՝ Արցախի Հանրապետությունը որոշակի ուղիղ կապեր ունի միջազգային կազմակերպությունների որոշ ներկայացուցիչների հետ։
«Հաճախ դրանք պաշտոնական շփումներ չեն։ Մենք մեր կարծիքը կարող ենք այդ կերպ հասցնել, բայց հիմնական շփումները տեղի են ունենում Հայաստանի միջոցով», – ասաց Բեգլարյանը` կարևորելով դիվանագիտական կորպուսի դերը։–0–
