Արցախի ԱԳՆ–ից նշել են, թե Ստեփանակերտի օդանավակայանը սկզբնական փուլում ինչ նպատակներով է շահագործվելու

ԵՐԵՎԱՆ, 15 հունվարի./Նովոստի–Արմենիա/. Ստեփանակերտի օդանավակայանը, ամենայն հավանականությամբ, նախնական փուլում կշահագործվի խաղաղապահների համար, ասել է Արցախի ԱԳ նախարար Դավիթ Բաբայանը Հանրային հեռուստաընկերությանը տված հարցազրույցում։

«Կարծում եմ, որ օդանավակայանը կշահագործվի, պարզապես ժամանակ է պետք։ Այս պահին, իմ կարծիքով, ամեն ինչ գնում է նրան, որ առաջին հերթին այն կշահագործվի որպես ռազմական օբյեկտ խաղաղապահների կողմից` նրանց կարիքները և անվտանգության հարցերն ապահովելու համար», – ասել է Բաբայանը։

Նրա խոսքով, կսկսվեն քայլեր և գործողություններ, որպեսզի այդ օբյեկտն օգտագործվի նաև քաղաքացիական նպատակներով։

«Ես գրեթե չեմ կասկածում, որ այն շահագործվելու է, ժամանակը ցույց կտա։ Որպես ռազմական օբյեկտ, կարծում եմ, այն կշահագործվի», – ասել է Բաբայանը։

Ստեփանակերտի օդանավակայանի մասին

Ստեփանակերտի միջազգային օդանավակայանը պատրաստ է թռիչքներ սպասարկել, այն պաշտոնապես շահագործման է հանձնվել 2012թ.–ի հոկտեմբերի 1–ին։ Օդանավակայանը հագեցած է միջազգային չափորոշիչներին համապատասխան բոլոր սարքավորումներով և կարող է սպասարկել ժամում մինչև 100 ուղևոր։ Օդանավակայանը մշակվել է` հաշվի առնելով միջազգային չվերթերի իրականացման հնարավորությունը։

Ստեփանակերտի օդանավակայանի շահագործումից հետո պաշտոնական Բաքուն պարբերաբար սպառնում էր ուժ կիրառել օդանավերի դեմ, որոնք կիրականացնեն չվերթեր դեպի Ղարաբաղ։ Սակայն 2012թ.–ի հուլիսին ԵԱՀԿ Մինսկի խմբի համանախագահները հայտարարեցին, որ ձեռք են բերվել քաղաքացիական օդանավերի նկատմամբ ուժի չկիրառման երաշխիքներ։–0–