«Եթե ես հանդիպեմ, ինձ կուտեն». Քոչարյանն ` այն մասին, թե ինչու տեղի չի ունեցել իր և Արցախի նախագահի հանդիպումը

ԵՐԵՎԱՆ, 5 դեկտեմբերի./Նովոստի–Արմենիա/. Հայաստանի և Արցախի նախկին նախագահ Ռոբերտ Քոչարյանը 5–րդ ալիքին տված հարցազրույցում պատմել է Արցախի նախագահ Արայիկ Հարությունյանի հետ իր չկայացած հանդիպման մի շարք հանգամանքների մասին։

«Ընդամենը պահանջվեց մեկ ու կես օր, երկու օր հասկանալու համար, որ մենք լրջագույն պրոբլեմի առաջ ենք, և օր առաջ պետք է կանգնեցնել այս պատերազմը, թեկուզ լուրջ զիջումներով: Օր առաջ: Ազերիների տեխնոլոգիական առավելությունը ակնհայտ էր, իսկ մեր մոտ, մենք ուղղակի տեսնում էինք կազմակերպչական լուրջ խնդիրներ, ես չգիտեի, որ համալրումն է դադարեցված և մի շարք այլ կազմակերպչական ուղղակի անհեթեթություններ, որոնք գալիս էին, կրկնում եմ, քաղաքական իշխանությունից», – ասել է նա։

Քոչարյանը պատմել է, որ կիսվել է որոշ գաղափարներով և Արկադի Ղուկասյանի հետ, և Բակո Սահակյանի հետ, և Բակո Սահակյանը առաջարկել է հանդիպում կազմակերպել Արայիկ Հարությունյանի հետ։


«Ես Արայիկ Հարությունյանի նկատմամբ առանձնապես համակրանք չեմ ունեցել երբեք, բայց, այնուամենայնիվ, հանգամանքներից ելնելով, համարեցի, որ այո, պետք է կիսվել գործող նախագահի հետ և մտահոգություններով և որոշ առաջարկներով, թե ինչ է պետք անել այս իրավիճակում»,– նշել է Քոչարյանը։

Նախկին նախագահի խոսքով, Բակո Սահակյանը գնաց այդ հանդիպումը կազմակերպելու համար, երբ որ հետ եկավ, տարակուսանք էր իր դեմքին։

«Արայիկ Հարությունյանն ասում է. «չեմ կարա սա անեմ, եթե ես հանդիպեմ, ինձ կուտեն, և այդ հանդիպումը վատ կանդրադառնա Ղարաբաղի վրա»։ Չեմ ուզում մանրամասնություններով կիսվել, քանի որ այդ խոսակցությունը ուրիշ մարդու հետ խոսակցություն է, խոսակցությունը եղել է Բակո Սահակյանի և Արայիկ Հարությունյանի միջև», – ասել է Քոչարյանը։–0–