ԵՐԵՎԱՆ, 10 օգոստոսի./Նովոստի–Արմենիա/. Եզդիների ցեղասպանության հարցը նախատեսվում է ներկայացնել միջազգային դատարանում:
Այս մասին այսօր կայացած ասուլիսի ժամանակ հայտնեցին Եզդիների ազգային միության նախագահ Խդր Հաջոյանը և Հայաստանում եզդիների հոգևոր առաջնորդ Շեյխ Բրո Հասանյանը:
Եզդիների ազգային միության նախագահ, իրավաբան Խդր Հաջոյանի խոսքով՝ արդեն բավական երկար ժամանակ է` համապատասխան փաստեր են հավաքվում 2014 թ. օգոստոսի 3-ին տեղի ունեցած ցեղասպանության հետևանքով տարբեր երկրներում բնակեցված եզդիական համայնքների ներկյացուցիչների մասին՝ միջազգային դատարան դիմելու նպատակով:
«Մի ամբողջ ժողովուրդ ենթարկվեց ցեղասպանության: Պետք է նշեմ, որ ցեղասպանությունը դատապարտող կոնվեցիան իրենից ենթադրում է 5 կետ, որոնցից մեկի առկայության դեպքում էլ այն կարող է որակվել որպես ցեղասպանություն»,-ասաց Խդր Հաջոյանը:
Նա նշեց նաև, որ խմբակային սպանություններ տեղի ունեցան Կոջո եզդիական գյուղում (գյուղը գտնվում է Իրաքում, խմբգր.): Մոտ 800 տղամարդկանց, իրենց կրոնական պատկանելիության հիմունքներով, ստիպեցին իսլամ ընդունել, ինչը մերժելու համար նրանք ենթարկվեցին սպանդի իսլամական պետության ահաբեկչական խմբավորման կողմից:
«Դրանից հետո մոտ 400 եզդիներ ապաստան գտան իրենց պատմական Շանգալի լեռներում: Նրանք այնտեղ ապրել են առանց ջրի, սննդի` գտնվելով շրջափակման մեջ, որն ի դեպ, ևս համարվում է ցեղասպանության մաս: Դրանից հետո նրանք մեծ խմբերով տեղափոխվեցին Սիրիա, հետո արդեն ներկայիս Քուրդիստանի հարակից տարածքներ», - ասաց Եզդիների ազգային միության նախագահը:
Հաջոյանի խոսքով, հետագայում ստեղծվեցին բռնի տեղահանվածների ճամբարներ, և նրանք միչև հիմա գտնվում են այդ կարգավիճակում, հիմա էլ վրաններում են ապրում:
«Մենք աշխատելու ենք այն ուղղությամբ, որպեսզի ոչ թե դա պարզապես միջազգային դատարանով դատապարտվի, այլ, որ այս ոճրագործությունը իրականացրած անձինք հայտնաբերվեն և պատասխանատվության ենթարկվեն հենց միջազգային դատարանում»,-նշեց նա:
Բանախոս Շեյխ Բրո Հասանյանը ևս նշեց, որ եզդիները փախստականի ճանապարհը բռնեցին: Նրանց մի մասը մնաց Սիրիայում, որոշ մասն էլ գնաց Եվրոպա: Եվրոպայում վերաբնակեցվածները ինչ-որ չափով ապահովված են, բայց Սինջարում (Իրաք, խմբգր.) և Սիրիայում բնակվողների նյութական վիճակն այնքան էլ լավ չէ:
Նա հավելեց նաև, որ շատ եզդիներ ցանկանում են վերադառնալ Շանգալ (Իրաք), բայց Թուրքիան խոչընդոտում է, ավիահարվածներ է հասցնում, ինչը վախի զգացում է առաջացնում եզդի հասարակության շրջանում:
«Դա ևս պատահական չէ, ծրագրված է, որովհետև ՄԱԿ-ն այսօր պահանջում է եզղի փախստականների թիվ, ինչի արդյունքում եզդիներին կտրամադրվի պետական կարգավիճակ: Եվ դա չիրականացնելու համար Թուրքիան նման քայլերի է գնում»,-ասաց Շեյխ Բրո Հասանյանը:
Հաջոյանն էլ հավելեց՝ իրենց գլխավոր ուղերձը միջազգային հանրությանն այն է, որ եզդիները, լինելով աշխարհի հնագույն ազգերից մեկը, այսօր չունեն իրենց ազգային պետականությունը, ուստի խնդրում են՝ կանգնեն իրենց կողքին, և օգնեն այս հարցում:
«Որպեսզի միջազգայնորեն ճանաչվի, դատապարտվի և համապատասխան աջակցություն կամ անվտանգային գոտի ստեղծվի: Սա է մեր կոչը, և ևս մեկ անգամ շեշտում եմ, որ, եթե ցեղասպանությունները չկանխարգելվեն, կլինեն նորերը»,-ասաց Խդր Հաջոյանը:
Նա նաև ընդգծեց, որ այսօր աշխարհի տարբեր անկյուններում բնակվող եզդիական համայնքներ ևս աջակցում են այս հարցում, և եզդիների ցեղասպանության ճանաչման գործընթացը կարող է իրականցվել Հռոմի դատարանում:–0–
