ԵՐԵՎԱՆ, 6 նոյեմբերի./Նովոստի–Արմենիա/. ԱՄՆ նախագահ Դոնալդ Թրամփի վարչակազմը դեմ է Թուրքիայի նկատմամբ պատժամիջոցներին, որոնք ընդունվել են Ներկայացուցիչների պալատի կողմից նախորդ շաբաթ։ Թրամփի վարչակազմը դեմ է նաև Հայոց ցեղասպանությունը դատապարտող բանաձևին, գրում է Bloomberg–ը։
«Վարչակազմից նշում են, որ այս երկու նախաձեռնությունները կարող են հանգեցնել ՆԱՏՕ–ի առանցքային դաշնակցի հետ հարաբերությունների հետագա սրմանը», – հայտարարել է Պետդեպարտամենտի բարձրաստիճան պաշտոնյան, որը ցանկացել է մնալ անանուն։
Պետդեպարտամենտում մտահոգ են, որ նախորդ շաբաթ Ներկայացուցիչների պալատի ընդունած պատժամիջոցները, ի պատասխան Սիրիայի հյուսիսում իրականացվող թուրքական ռազմական գործողությունների, կսահմանափակեն ԱՄՆ–ի հնարավորություններն` ուղղված Թուրքիայի հետ իրավիճակի կարգավորմանը։
Загружается новость ... "Лево"
Պաշտոնյան հրաժարվել է հայտնել՝ արդյոք նախագահ Թրամփը մտադիր է վետո սահմանել օրինագծի նկատմամբ, թե ոչ:
Թիվ 4695 բանաձևով պատժամիջոցներ են սահմանվում թուրք բարձրաստիճան պաշտոնյաների դեմ, որոնց մուտքն ԱՄՆ արգելվում է: Բանաձևով արգելվում է նաև ԱՄՆ ռազմական տեխնիկայի մատակարարումը Թուրքիա՝ Սիրիայում օգտագործելու նպատակով:
Գործակալության զրուցակիցն անդրադարձել է նաև ԱՄՆ Ներկայացուցիչների պալատի կողմից հավանության արժանացած թիվ 296 բանաձևին, որը դատապարտում է նախորդ դարասկզբին Օսմանյան կայսրությունում 1,5 մլն հայերի ջարդը։
Էրդողանի կառավարությունը վճռականորեն դեմ է հանդես եկել բանաձևին և կանչել է ԱՄՆ–ում իր դեսպանին`անհամաձայնություն հայտնելու համար։
Загружается новость ...
"Право"
Պետդեպարտամենտի պաշտոնյայի խոսքով, հարմար ժամանակ չի ընտրվել Ցեղասպանության բանաձևի ընդունման համար, և դա կարող է հանգեցնել օրենքի ընդունման, որն ավելի շատ կկրի պատժիչ, քան սկզբունքային բնույթ։
Bloomberg–ի հրապարակման մեջ նշվում է, որ Թրամփի նախագահության օրոք Սպիտակ տունը ձեռնպահ է մնացել Հայոց ցեղասպանության մասին հայտարարություններից, սակայն նախկին վարչակազմերը ևս զգուշացել են Ցեղասպանության մասին բանաձևերից` պնդելով, որ դա միայն կխանգարի հաշտեցմանը։ Թուրքիան երկար տարիներ զգուշացրել է, որ նման բանաձևերը կհանգեցնեն հարաբերությունների խզման։
Պետդեպարտամենտի պաշտոնյայի խոսքով, ԱՄՆ–ի դիրքորոշումը չի փոխվել, երկրում ոգեկոչում են Օսմանյան կայսրությունում սպանված և տարհանված 1,5 մլն հայերի հիշատակը։
«ԱՄՆ–ն արդեն հարգել է «Մեծ եղեռնի» հիշատակը, որը 20–րդ դարի ամենասարսափելի զանգվածային վայրագություններից մեկն է», – նշել է պաշտոնյան։–0–