ԵՐԵՎԱՆ, 17 սեպտեմբերի. /Նովոստի–Արմենիա/. «Լուսավոր Հայաստան» խմբակցությունը կարող է միանալ ՍԴ նախագահ Հրայր Թովմասյանի լիազորությունների դադարեցման գործընթացին, եթե ներկայացվեն սահմանադրական հստակ հիմքեր։ Այդ մասին երեքշաբթի ճեպազրույցում ասաց խմբակցության առաջնորդ Էդմոն Մարուքյանը։
Նախօրեին «Իմ քայլը» խորհրդարանական խմբակցությունը որոշեց ՍԴ նախագահ Հրայր Թովմասյանի լիազորությունների դադարեցման գործընթաց սկսել։ Այդ մասին Facebook-ի իր էջում գրել է Լիլիթ Մակունցը։
«Եթե մեզ առաջարկեն միանալ նախաձեռնությանը, ապա մենք կքննարկենք և համապատասխան որոշում կկայացնենք։ Մենք այս հարցում ոչնչով կապված չենք, քանի որ ժամանակին մեր պատգամավորները դեմ էին Հրայր Թովմասյանի թեկնածությանը»,– ասաց Մարուքյանը։
Загружается новость ... "Лево"
Պատգամավորը հայտնեց, որ «Լուսավոր Հայաստան» խմբակցությանն առայժմ այդ նախաձեռնությամբ ոչ ոք չի դիմել։
«Ինչպես հասկանում եմ, «Իմ քայլն» առայժմ նույնիսկ փաստաթուղթ չունի, որի հիման վրա կարելի է սկսել այդ գործընթացը»,– ասաց նա։
Մարուքյանը միաժամանակ ընդգծեց, որ խորհրդարանական ցանկացած խմբակցություն իրավունք ունի հանդես գալու Սահմանադրական դատարանի նախագահի փոփոխման նախաձեռնությամբ, սակայն պետք է հիմնավորի իր առաջարկը։
«Միայն հարց է ծագում, թե որքանով է գործընթացը սահմանադրական և ժողովրդավար։ Եթե այն անցնի պատշաճ կերպով, ապա մեր մասնակցության համար որևէ խոչընդոտ չենք տեսնում»,– ասաց նա։ -0-