ԵՐԵՎԱՆ, 13 հունիսի. /Նովոստի-Արմենիա/. Մայր եք, թե մարզիչ, գրող, թե գործարար, միևնույն է` օրվա սկսելու ձևը շատ կարևոր է մեր առողջության համար, գրում է pic-words.ru-ն:
Այուրվեդայի ավանդույթների համաձայն, մեր բոլոր գործողությունները կամ ուժեղացնում են մեր օրգանիզմի դիմադրողականությունը, կամ էլ քայքայում են այն: Եվ Այուրվեդան մեզ խորհուրդ է տալիս օրը սկսել առավոտյան ծեսերից, որոնք օգնում են մեր մարմինը դարձնել բնության ռիթմերին համահունչ, բարձրացնել մեր ինքնագնահատականը և սեփական կարգապահությունը:
Հիշեք` ձեր միտքը փորձելու է շեղել ձեզ ճշմարիտ ուղուց: Այն ասելու է, որ դուք պետք է ստուգեք էլեկտրոնային փոստը, զբոսանքի տանեք շանը, երեխաներին ուղարկեք դպրոց, որ դուք շտապում եք աշխատանքի, և որ պարզապես առավոտյան ծեսերի ժամանակը չունեք:
Բայց եթե կարող եք ընտրել առավոտյան մի ծես առողջությունը բարելավելու համար, ապա օրը սկսեք մի բաժակ կիտրոնահյութով գոլ ջրից:
Դրա օգուտը հսկայական է, քանի որ կիտրոնահյութով գոլ ջուրը`
1. Բարելավում է մեր դիմադրողականությունը
Կիտրոնը վիտամին C և կալիում է պարունակում: C վիտամինն օգնում է մեր օրգանիզմին դիմակայել մրսածությանը և վիրուսներին, իսկ կալիումը խթանում է ուղեղային գործունեությունը, նյարդային համակարգը, ինչպես նաև բարելավում է արյան ճնշումը:
2. Կարգավորում է թթվահիմնային հարաբերակցությունը
Կիտրոնն անփոխարինելի հիմնային մթերք է, հավատաք, թե ոչ: Այո, պտուղները թթու են, բայց մեր օրգանիզմում վերածվում են հիմնային միջավայրի (մեր օրգանիզմի յուրացրած կիտրոնաթթուն չի բարձրացնում թթվայնությունը): Իսկ ինչպես գիտեն առողջ ապրելակերպի ջատագովները, մարմնի թթվահիմնային ճիշտ հարաբերակցությունն առողջության գրավականն է:
Загружается новость ... "Лево"
3. Օգնում է ազատվել ավելորդ կիլոգրամներից
Կիտրոնները հարուստ են քաղցի զգացողությունը նվազեցնող պեկտինի մանրաթելերով: Բացի այդ, հետազոտություններն ապացուցում են, որ ավելի հիմնային դիետա պահողներն ավելի շուտ են ազատվում ավելորդ կիլորգրամներից: Եվ, բացի այդ, փորձը ցույց է տալիս, որ օրը ճիշտ կերպով սկսելն օգնում է այն ճիշտ շարունակել:
4. Նպաստում է մարսողությանը
Գոլ ջուրը խթանում է աղեստամոքսային տրակտի գործունեությունը, հատկապես` ստամոքսի և աղիների մկանների ալիքային կրճատումները, որոնք տրոհում են կերակուրը և դուրս բերում կենսագործունեության արգասիքները։ Բացի այդ, կիտրոններն ու լայմերը հարուստ են վիտամիններով և հանքային նյութերով, որոնք նվազեցնում են թունավոր նյութերի պարունակությունն օրգանիզմում։
5. Բնական ոչ ագրեսիվ միզամուղ է
Կիտրոնահյութն օգնում է դուրս բերել օրգանիզմից անպետք նյութերը, քանի որ միզամուղ է համարվում։ Իսկ թունավոր նյութերից արագ ազատվելն օգնում է պահպանել առողջությունն ընդհանուր առմամբ, և միզամուղ համակարգի առողջությունը` մասնավորապես։
6. Նպաստում է մաշկի առողջությանը
C վիտամինը բնական հակաօքսիդանտ է, որը պայքարում է կնճիռների դեմ։ Բացի այդ, գոլ ջրով կիտրոնը մաքրում է արյունը։
7. Պայքարում է օրգանիզմի ջրազրկման դեմ
Մի բաժակ առողջարար այս հեղուկը ոչ միայն լի է վիտամիններով և հանքանյութերով, այլ նաև օգնում է օրը սկսել առատ հեղուկ ընդունելուն, ինչը կանխարգելում է օրգանիզմի ջրազրկումը և պայքարում է մակերիկամների «հոգնածության» դեմ։ Երբ օրգանիզմը ջրազրկված է, այն չի կարող կատարել իր բոլոր ֆունկցիաները լիակատար կերպով, ինչը նույնպես հանգեցնում է թունավոր նյութերի կուտակման, սթրեսի, փորկապությունների և այլն։
Այսպիսով, օրը մեկ բաժակ կիտրոնահյութով ջրից սկսելն առաջին և լուրջ քայլն է դեպի առողջություն։ Եվ չզարմանաք, երբ կանոնավոր կերպով հետևելով այս պարզ կանոնին` որոշ ժամանակ անց ձեր կյանքը բոլորովին այլ երանգներ կունենա։ -0-