ԵՐԵՎԱՆ, 15 նոյեմբերի./Նովոստի–Արմենիա/. «ԳեոՊրոՄայնինգ» հանքարդյունաբերական ընկերությունների դիվերսիֆիկացված միջազգային խումբը միանում է Հայաստանի Հանրապետության վարչապետի հայտարարած ակցիային՝ մինչև 2020 թվականի հոկտեմբերի 10-ը տնկել 10 միլիոն ծառ, հաղորդում է ընկերության մամուլի ծառայությունը։
Ընկերությունը մտադիր է լայնածավալ աշխատանքներ իրականացնել իր ներկայության համայնքներում կանաչ տարածքներ ստեղծելու համար։ Ակցիան մեկնարկել է Ագարակ քաղաքում, որտեղ «Ագարակի պղնձա-մոլիբդենային կոմբինատի» աշխատակիցները, բնապահպանության և հանքային ռեսուրսների պետական տեսչության Սյունիքի բաժնի աշխատակիցների հետ միասին տնկել են կանադական բարդիների տասնյակ տնկիներ։ Կանաչ տարածքների ընդլայնման ուղղությամբ աշխատանքները կշարունակվեն հաջորդ գարնանը ։ Ընկերությունը տեղադրել է նաև ծառերը ջրելու ավտոմատ համակարգ։
«Բնապահպանության ոլորտի հարցերը մշտապես գտնվում են կոմբինատի ղեկավարության ուշադրության կենտրոնում, և ՀՀ վարչապետ Նիկոլ Փաշինյանի նախաձեռնությունը դարձավ բնապահպանական միջոցառումներն առավել արդիականացնելու ևս մեկ առիթ։ Մեղրի/Ագարակ համայնքների ցածրադիր վայրերը Հայաստանի չոր կլիմայական շրջաններից են, և մենք ուրախ ենք, որ մեր մասնակցությունը այս նախաձեռնությանը շոշափելի օգուտներ կբերի տարածաշրջանին, նրա բնակիչներին և հյուրերեին», – նշել է «Ագարակի պղնձա-մոլիբդենային կոմբինատի» գլխավոր տնօրեն Անդրեյ Սինյակովը։
Ներկայումս «ԳՊՄ գոլդ» ընկերությունը, որը «ԳեոՊրոմայնինգ» ընկերության հայաստանյան ակտիվներից մեկն է, տեղական իշխանությունների հետ աշխատում է Սոթք և Արարատ գյուղերում մշակութային, մարզական և զվարճանքի այգիներ հիմնելու ուղղությամբ։ Նախագծային աշխատանքները կսկսվեն 2020 թվականի գարնանը՝ մի քանի հազար տնկիների տնկմամբ։
«Մենք մտադիր են մեր ներկայության համայնքներում ստեղծել հայ-ռուսական բարեկամության պուրակ՝ պլանավորումից մինչև ոռոգում և խնամք։ Ներկայումս դենդրոլոգները մեզ մասնագիտական աջակցություն են ցուցաբերում լանդշաֆտի ձևավորման համար անհրաժեշտ մշտադալար ծառերի, ծաղկող թփերի և ծաղիկների տեսակների ընտրության հարցում՝ նկատի ունենալով այս տարածքների եղանակային և կլիմայական պայմանները», – նշել է «ԳՊՄ գոլդ» ընկերության գլխավոր տնօրեն Անատոլի Գոգոտինը։–0–
