ԵՐԵՎԱՆ, 8 մարտի. /Նովոստի-Արմենի/. Ինչի՞ մասին է երազում մարդկության գեղեցիկ կեսը: Իհարկե, սիրո, ընտանիքի, երեխաների մասին: Իսկ ի՞նչն է երջանկացնում մեր կանանց: Բոլոր վերը թվարկվածները: Եվ դա ճիշտ է, սակայն ամենը չէ: Պարզելու համար, թե ինչն է այսօր երջանկացնում հայուհիներին, «Նովոստի-Արմենիա» գործակալությունը որոշել է հարցնել հենց իրենց՝ կանանց:
Մելինե, 25 տարեկան
Առաջին հերթին, ինչպես բոլոր կանանց համար, կարևոր է կանացի երջանկությունը, ամուր և սիրող ընտանիքը: Իհարկե, կարևոր է նաև, սիրելի գործով զբաղվելը: Աշխատել այնտեղ, որտեղ դուր է գալիս, աշխատել հաճույքով: Հիմա երջանիկ լինելու համար ինձ միայն երկրորդ կեսն է պակասում:
Նելլի, 40 տարեկան
Ինձ երջանկացնում է պարզապես ապրելու հնարավորությունը. վայելել այս արևը, Երևանի կենտրոնով զբոսանքը, այն, որ ինձ մոտ ամեն ինչ լավ է: Հենց դա էլ դարձնում է ինձ աշխարհի ամենաերջանիկ կինը:
Վարդուհի, 46 տարեկան
Ունենալ լավ, սիրող ընտանիք. դա ամենակարևորն է: Հենց դա է երջանկությունը:
Կարինե, 18 տ.
Ինձ, անկեղծ ասած, երջանկացնում է, երբ մարդիկ ժպտում են, ուրախ քայլում փողոցով, վայելում կյանքը: Չէ որ կյանքը լի է բազում հիասքանչ երևույթներով: Պետք է պարզապես ապրել և վայելել:
Անի, 27 տ.
Երջանկությունը մի քանի ակնթարթների մեջ է, այդ պատճառով անգամ անցորդների ժպիտները բավական են՝ մի որոշ ժամանակով քեզ երջանիկ զգալու համար:
Գալինա, 38 տ.
Ինձ համար երջանկություն է, որ իմ հարազատներն առողջ լինեն, որ շուրջս բարի մարդիկ շատ լինեն, շատ արև լինի: Եվ եթե երեխաս առողջանար ու սկսեր խոսել, իհարկե, ես աշխարհի ամենաերջանիկ մայրիկը կլինեի:
Իզաբելլա, 27 տ.
Լավ հարց է, խորը հարց է: Այս հարցին պատասխանում են փիլիսոփաներն արդեն հարյուրավոր տարիներ շարունակ: Բայց այս պահին ինձ երջանիկ է դարձնում գարնանային արևը և լավ գիրքը: Ամեն բան շատ պարզ է: Ու հարազատներիս ժպիտը, և, գուցե, սարերը: Ես շատ եմ սիրում սարեր: -0-
