Օրական մեկ հավկիթի օգտագործումը նվազեցնում է ուղեղի կաթվածի զարգացման ռիսկը

ԵՐԵՎԱՆ, 29 սեպտեմբերի. /Նովոստի–Արմենիա/. Ամերիկացի գիտնականները բացահայտել են, որ հավկիթի օգտագործումն ազդում է անոթների վրա և 12 տոկոսով նվազեցնում է ուղեղի կաթվածի զարգացման ռիսկը։

Ուսումնասիրության արդյունքները հրապարակվել են Journal of the American College of Nutrition ամսագրում, գրում է vokrugsveta.ru–ն` հղում անելով EurekAlert–ին։

1982–2015թթ.–ին անցկացված սիստեմատիկ մետա վերլուծության արդյունքում բացահայտվել է, որ հավկիթն ու դրանից պատրաստված մթերքը դրական են ազդում ուղեղի կաթվածի կանխարգելման գործում։ Միաժամանակ չի հաստատվել հավկիթի կապը սրտի իշեմիկ հիվանդության, ինչպես նաև սիրտ–անոթային համակարգի վրա բացասական ազդեցության զարգացման հետ։

Գիտնականները նշում են, որ դեռևս չեն կարողանում բացատրել առողջության վրա հավկիթի ազդեցության մեխանիզմը։

Հնարավոր է` գլխավոր գործոնները սննդարար նյութերն են, վիտամինները, հանքանյութերն ու հակաօքսիդանտները։ Ի դեպ, նախկինում կատարված ուսումնասիրությունները ևս բացահայտել են սպիտակուցների դրական ազդեցությունը, որոնք նվազեցնում են ճնշումը անոթներում։–0–