Յոդի «ցանցի» առանձնահատկությունները

ԵՐԵՎԱՆ, 4 հուլիսի. /Նովոստի–Արմենիա/. Յոդը հայտնաբերվել է 1811 թ.-ին ֆրանսիացի քիմիկոս Բերնար Կուրտուայի կողմից:

Յոդին ծանոթ են բոլորը։ Մատը վնասելուն պես մենք անմիջապես վերցնում ենք յոդի սպիրտային լուծույթի սրվակը: Շատերի մոտ յոդի օգտագործման վերաբերյալ պատկերացումներն այսքանով ավարտվում են, մինչդեռ նրա կիրառման ոլորտը շատ ավելի լայն է:

Չափահաս մարդու օրգանիզմում կա 20-50 մգ յոդ, որից մոտ 8 մգ–ն կենտրոնացված է վահանագեղձում:

Կենցաղում օգտագործվում է նաև, այսպես կոչված, յոդի «ցանցը» (йодовая клетка)։ Takprosto.cc–ն ներկայացնում է նման «ցանցի» երեք առանձնահատկությունները։

1. Ոտնաթաթերի վրա արված յոդի «ցանցը» բարելավում է արյան շրջանառությունը, ինչը թույլ է տալիս հանել ոտքերի այտուցվածությունը: Այս հնարքը հատկապես օգտակար կլինի նրանց համար, ովքեր ստիպված են շատ քայլել կամ կանգնել:

2. Յոդը նաև բարձրացնում է մարմնի ջերմաստիճանը: Այդ իսկ պատճառով հարբուխի ժամանակ, եթե հնարավորություն չկա ոտքերը դնել տաք ջրի մեջ, հարկավոր է գիշերը ոտնաթաթերի վրա յոդային «ցանց» անել և հագնել տաք գուլպաներ:

3. Յոդային «ցանցն» ունի ևս մի հատկություն: Այն կարող է ցույց տալ օրգանիզմում յոդի մակարդակը: Եթե «ցանցը» առավոտյան անհետանում է, դա նշանակում է, որ օրգանիզմում կա յոդի պակաս, և հարկավոր է սննդակարգում ավելացնել ծովամթերքի և յոդ պարունակող այլ բաղադրիչների քանակը:

Ինչպե՞ս նկարել յոդի «ցանց»

Մինչ յոդի «ցանց» անելը, հարկավոր է համոզվել, որ դուք ալերգիկ չեք: Դա ստուգելու համար հարկավոր է դաստակի ներսի հատծավի վրա քսել մի փոքր յոդ և սպասել 15-30 րոպե: Եթե այդ ընթացքում ոչ մի ցավոտ զգացում կամ կարմրածություն չի առաջանում, ապա կարելի է անցնել հաջորդ փուլին:

Ոչ մի դեպքում չի կարելի յոդը քսել ամբողջական շերտով, այլապես կարելի է այրվածք ստանալ: Հարկավոր է ականջի փայտիկով ոտնաթաթերի վրա բարակ ցանց նկարել` մոտ 1х1 սմ աղյուսներով:

Պետք չէ մոռանալ, որ չնայած այս մեթոդի արդյունավետությանը, այն չի կարելի չարաշահել: Բժիշկները խորհուրդ են տալիս յոդի «ցանց» անել շաբաթը 3-4 անգամից ոչ հաճախ:–0–