Իսկական հերոս. Լուգայում հայ տղամարդը փրկել է փոքրիկ աղջկան բոցավառվող բնակարանից

ԵՐԵՎԱՆ, 13 փետրվարի./Նովոստի–Արմենիա/. Ռուսաստանի Լուգա քաղաքում Ալեքսանդր Վարդանյանը փրկել է փոքրիկ աղջկան հրդեհի ժամանակ։

Ինչպես հաղորդում է «Լենինգրադի մարզային հեռուստաընկերություն» կայքը, նախորդ կիրակի` փետրվարի 10–ին, ժամը 13։03–ին Լուգայի հրշեջներն ահազանգ են ստացել 5 հարկանի շենքի առաջին հարկի բնակարանում բռնկված հրդեհի մասին։

Տեղական ընկերության աշխատակից Ալեքսանդր Վարդանյանն այդ ժամանակ վերանորոգելիս է եղել շենքի տանիքը։ Զգալով ծխի հոտը` նա իջել և տեսել է, թե ինչպես են բնակարաններից մեկի դռան արանքից դուրս պրծնում ծխի քուլաներ։ Մինչև հարևանները կանչել են հրշեջներին և շտապօգնության աշխատակիցներին, Ալեքսանդրը սպասել է բնակարանի տարեց տիրոջը, ով բացել է դուռը։

Իմանալով, որ բնակարանում փոքրիկ երեխաներ կան` Ալեքսանդրը շտապել է ներս` չսպասելով հրշեջներին։ Վտանգելով սեփական կյանքը` տղամարդը ծխի միջով ներխուժել է սենյակ, շոշափելով գտել փոքրիկ աղջկա ձեռքը, ով այդ ժամանակ անգիտակից վիճակում ընկած է եղել հատակին, ինչից հետո զգուշորեն դուրս է հանել երեխային փողոց։

Սենյակում մնացած տղային փրկել են դեպքի վայր ժամանած հրշեջները։ Երեխաները ծանր վիճակում հոսպիտալացվել են։