«Հիմա պետք է ինչ–որ եզրակացություններ անել». Փաշինյանը` Հայաստանի հավաքականի ջախջախիչ պարտության մասին

ԵՐԵՎԱՆ, 20 նոյեմբերի./Նովոստի–Արմենիա/. Եվրո–2020–ի ընտրական փուլի շրջանակում իտալացիների հետ հանդիպման արդյունքում Հայաստանի հավաքականի պարտությունը բավականին ծանր արձագանք ստացավ Հայաստանում։Այս մասին հայտարարել է ՀՀ վարչապետ Նիկոլ Փաշինյանը, հաղորդում է rg.ru–ն։

Նոյեմբերի 18–ին Պալերմոյում կայացած Իտալիա–Հայաստան հանդիպումն ավարտվեց 9։1 հաշվով` հօգուտ իտալացիների։ Սա Հայաստանի հավաքականի ամենախոշոր պարտությունն է։ Միաժամանակ, 1948թ.–ից հետո առաջին անգամ Իտալիայի հավաքականը խփեց միանգամից 9 գոլ մեկ հանդիպման ժամանակ։

«Իհարկե, սա շատ ծանր պարտություն է, քանի որ այս տարի մենք ունեինք ինչ–որ բան անելու հնարավորություն, սակայն, ցավոք, դա տեղի չունեցավ։ Հիմա պետք է ինչ–որ եզրակացություններ անել», – հայտարարել է Փաշինյանը նախօրեին ռուսաստանցի լրագրողների հետ հանդիպման ժամանակ։

Վարչապետը նաև հիշեցրել է, որ մինչև 2050թ.–ը Հայաստանի զարգացմանն ուղղված իր ռազմավարական ծրագրում նա խնդիր էր դրել հասնել ֆուտբոլի հավաքականի հաղթանակի Եվրոպայի կամ աշխարհի առաջնությունում։–0–