ԵՐԵՎԱՆ, 18 հուլիսի. /Նովոստի-Արմենիա/. Հայաստանի նոր ազգային մարզադաշտի կառուցման համար ներդրողը պատրաստ է ներդնել 300 մլն դոլար, Facebook–ի իր էջում գրել է կրթության, գիտության, մշակույթի և սպորտի փոխնախարար Գևորգ Լոռեցյանը։
«Առաջարկն արդեն փոխանցվել է համապատասխան մարմիններին հետագա առաջխաղացման համար»,– ասաց նա։ Փոխնախարարը հայտնել է, որ դեռևս ապրիլի վերջին եղել է ԱՄՆ–ում, որ տեղում բանակցություններ վարի պոտենցիալ ներդրողի հետ։
«Բանակցություններն անցել են ավելի քան հաջողված, և ամերիկացի ներդրողն արդեն պաշտոնական առաջարկ է կազմել ու ուղղել Կրթության, գիտության, մշակույթի և սպորտի նախարարություն։ Առաջարկում նշվում է, որ ներդրողը պատրաստ է մինչև 300 մլն դոլար ներդնել Հայաստանում ՈՒԵՖԱ–ի չորրորդ կարգի մարզադաշտի կառուցման մեջ»,– ասաց Լոռեցյանը։
Նա հայտնեց, որ մարզադաշտի տարողությունը կկազմի մոտ 35-40 հազար տեղ և կհամապատասխանի ամենաբարձր միջազգային չափանիշներին։ «Այժմ քննարկումներ են տարվում մարզադաշտի հնարավոր տեղի վերաբերյալ։ Ցանկանում եմ միանգամից նշել, որ, հավանաբար, մարզադաշտը կկառուցվի Երևանի տարածքում, քանի որ չորրորդ կարգի մարզադաշտը Երևանի սահմաններից դուրս կզրկի մեզ ամենաբարձր կարգի միջազգային հանդիպումներ ընդունելու հնարավորությունից»,– հայտնեց փոխնախարարը։
Լոռեցյանի խոսքով, միջազգային հանդիպումների ընդունման համար պետք է համապատասխան ենթակառուցվածք, որը Երևանից դուրս բացակայում է։
Ավելի վաղ հաղորդվել է, որ ՈՒԵՖԱ–ն կարող է որակազրկել Երևանի Հանրապետական մարզադաշտը, իսկ նոր մարզադաշտի կառուցման համար պահանջվում է 100 մլն դոլարի ներդրում։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
