ԵՐԵՎԱՆ, 10 փետրվարի. /Նովոստի-Արմենիա/. Հայաստանի օլիմպիական հավաքականը 2020թ.-ի 32-րդ ամառային օլիմպիական խաղերի շրջանակում կտեղակայվի Մինամիայզու քաղաքում, հայտնեց Հայաստանում Ճապոնիայի դեսպան Ջուն Յամադան:
«Ճապոնիայի բոլոր խոշոր քաղաքներից յուրաքանչյուրն այդ օրերին կընդունի Օլիմպիադային մասնակցող հավաքականներից մեկին: Հայաստանի հավաքականին հրավիրում է Մինամիայզու քաղաքը», - ասաց դիվանագետը երկուշաբթի ասուլիսի ժամանակ:
Մինամիայզուն գտնվում է Ճապոնիայի Ֆուկուսիմա շրջանում:
Յամադայի խոսքով, հայ մարզիկներին սպասվում է ոչ միայն ճապոնական հյուրընկալությունը, այլև բիզնես առաջարկ, մասնավորապես, դա վերաբերում է հունահռոմեական ոճի ըմբիշներին:
Նա նշեց, որ Ճապոնիան շահագրգռված է Հայաստանի հետ սերտ համագործակցության ամրապնդմամբ ոչ միայն սպորտի ոլորտում, այլև քաղաքների միջև կապերի զարգացման առումով:
«Ցավոք, մինչ այժմ Ճապոնիայի և Հայաստանի միջև քույր քաղաքներ չկան: Մինամիայզու քաղաք հրավերը կլինի այս ուղղությամբ կառուցողական քայլերից մեկը», - ասաց դեսպանը:
Վիզայի ռեժիմի դյուրացում
Յամադան խոստացավ, որ օլիմպիական խաղերից առաջ Հայաստանի քաղաքացիների համար վիզաների ստացման գործընթացը զգալիորեն կհեշտացվի:
«Որքան շուտ ՀՀ քաղաքացիները դիմեն վիզայի համար, այնքան լավ: Այնուամենայնիվ, գործընթացն ինքնին կտևի չորս օրից ոչ ավելի», - ասաց նա ՝ նշելով, որ վիզա ստանալու համար անհրաժեշտ կլինի փաստաթղթերի նվազագույն փաթեթ:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում