ԱԺ ընդդիմությունը բոյկոտեց նիստն ու մեկնեց Արցախ և Հայաստանի սահմանամերձ մարզեր

ԵՐԵՎԱՆ, 12 ապրիլի./Նովոստի–Արմենիա/. ԱԺ ընդդիմությունն այսօր բոյկոտեց քառօրյա նիստը։ «Հայաստան» ընդդիմադիր խմբակցության ղեկավար Սեյրան Օհանյանը հայտարարեց, որ մեկնում են Հայաստանի սահմանամերձ մարզեր և Արցախ։

«Հայաստանի ու Արցախի առաջ լրջագույն մարտահրավերներ են ծառացել. իրենց հրավիրած վերջին հանրահավաքում նշվել են երկրի անվտանգությանն առնչվող այն կարմիր գծերը, որոնցից այն կողմ որևէ իշխանություն իրավունք չունի քայլ անել: Մեզ համար սակարկելի չեն ՀՀ անկախության հռչակագրում նշված դրույթները՝ մեր տարածքային ամբողջականությունը, սուվերենությունը, անընդունելի ենք համարում ղարաբաղյան հակամարտության կարգավորման որևէ տարբերակ, որի դեպքում Արցախը կարող է հայտնվել Ադրբեջանի կազմում»,- հայտարարեց Օհանյանը` նշելով, որ Հայաստանի ներկայիս իշխանությունն անկարող է լուծել ներքին ու արտաքին բազմաթիվ խնդիրներ։

«Վերջին զարգացումները հաստատում են այն մտահոգությունները, որ ամեն ինչ ընթանում է ադրբեջանա-թուրքական օրակարգով: Ելնելով ստեղծված իրավիճակից՝ խորհրդարանական ընդդիմությունը հայտարարում է, որ չի մասնակցելու այս շաբաթվա նիստերին ու քվեարկություններին, մենք մեկնում ենք Արցախ ու Հայաստանի սահմանամերձ մարզեր», – ասաց Օհանյանը, ինչից հետո ընդդիմադիր պատգամավորներն Արցախի դրոշներ տեղադրեցին սեղաններին։

«Պատիվ ունեմ» խմբակցության քարտուղար Հայկ Մամիջանյանն իր հերթին հայտարարեց, որ «Պատիվ ունեմը» նույնպես չի մասնակցելու նիստերին և մեկնում է Արցախ:

Դրանից հետո ընդդիմադիր պատգամավորները հեռացան նիստերի դահլիճից։–0–