Արի գնանք կինո. հայտնի է, թե որտեղ է գործելու երևանյան ավտոկինոթատրոնը

ԵՐԵՎԱՆ, 1 հուլիսի./Նովոստի–Արմենիա/. Ինչպես արդեն հայտնել էինք, հուլիսին Երևանում կբացվի առաջին ավտոկինոթատրոնը։

Ինչպես «Նովոստի–Արմենիա» գործակալությանը հայտնեց RiverSide ընկերության համահիմնադիր Հովհաննես Վահրամյանը, ավտոկինոթատրոնը գտնվելու է «Մերիդիան» էքսպո–կենտրոնի մոտակայքում` Ոսկերիչների փողոցի վրա։

Ավտոկինոթատրոնի տարածքում կարող է տեղակայվել մինչև 82 ավտոմեքենա։

Նախատեսվում է ամեն օր կազմակերպել երկու կինոդիտում` ժամը 20։30–ին և 23։30–ին։

Ցուցադրվելու են հիմնականում պրեմիերաներ, չնայած հնարավոր են նաև լայն վարձույթի ֆիլմերի ցուցադրություններ։

Ինչպես նշեց Վահրամյանը, մարդիկ կարող են մեքենայով մտնել կինոթատրոնի տարածք, միացնել ձայնը ռադիոընդունիչի միջոցով ու դիտել ֆիլմը մեծ էկրանի վրա։

Տարածքում գործելու են նաև բար և սննդի կետեր։ Հետագայում նախատեսվում է կազմակերպել կինոդիտումներ ոչ միայն մեքենաներում, այլև բաց երկնքի տակ։

Վահրամյանի խոսքով, կինոթատրոնը մտածված է որպես խոշոր հարթակ, որին կմիանան տարբեր կազմակերպություններ։ Այսպես, արդեն կան սքայբոլի և հեռադիտակի գործարկման ծրագրեր։

«Հետաքրքրությունը գերազանցեց մեր սպասումները։ Եվ դա ոչ միայն այն պատճառով, որ մարդիկ այս ընթացքում չեն կարողանում այցելել կինո, քանի որ կինոթատրոնները փակ են, մարդիկ նաև փնտրում են ժամանցի նոր տարբերակներ, որոնք, մեր ընդհանուր ցանկությամբ, պետք է լինեն անվտանգ», – ասաց նա` ավելացնելով, որ հետագայում հարթակը կարող է օգտագործվել նաև համերգների համար։

Վահրամյանն ընդգծեց, որ սկզբնական շրջանում կբացվի 10–14 աշխատատեղ, իսկ հետագայում այդ թիվը կարող է ավելանալ այլ կազմակերպությունների հետ համատեղ նախագծերի շնորհիվ։ Նախատեսվում է փոքր մասնաճյուղ բացել Դիլիջանում։

«Մենք ուզում ենք մարդկանց հնարավորություն տալ գալ և ներկայացնել իրենց բիզնեսը, ստեղծել հարթակ այլ բիզնեսի համար»,– ասաց նա` ավելացնելով, որ համահիմնադիրները նախագիծն իրականացնում են սեփական միջոցներով։–0–